ماہنامہ انوار مدینہ لاہور نومبر 2017 |
اكستان |
 |
علمی مضامین سلسلہ نمبر١٥ قسط : ٢ ''خانقاہِ حامدیہ''نزد جامعہ مدنیہ جدید رائیونڈ روڈ لاہورکی جانب سے محدث ، فقیہ، مؤرخ، مجاہد فی سبیل اللہ،مؤلف کتب کثیرہ شیخ الحدیث حضرت اَقدس مولانا سیّد محمد میاں صاحب رحمة اللہ علیہ کے بعض اہم مضامین جو تاحال طبع نہیں ہوسکے اُنہیں سلسلہ وار شائع کرنے کا اہتمام کیا گیا ہے جبکہ اُن کی نوع بنوع خصوصیات اِس بات کی متقاضی ہیں کہ اِفادۂ عام کی خاطر اُن کو شائع کردیا جائے۔ اِسی سلسلہ میں بعض وہ مضامین بھی شائع کیے جائیں گے جو بعض جرا ئد و اَخبارات میں مختلف مواقع پر شائع ہو چکے ہیں تاکہ ایک ہی لڑی میں تمام مضامین مرتب و یکجا محفوظ ہو جائیں۔ (اِدارہ)صالح جمہوریت اور تعمیر جمہوریت تعلیمات ِ قرآنِ پاک کی روشنی میں ( شیخ الحدیث حضرت مولانا سیّد محمد میاں صاحب )اصلاحِ معاشرہ کے اصول : سورۂ حجرات کی آیت ١٣ وہ ہے جس میں بتایا گیا ہے کہ تمام انسان ایک ماں باپ کی اولاد ہیں مگر اس سے پہلے آیت ١١، ١٢ اور آیت ١، ٢، ٦، ٩ وغیرہ میں اُن اُمور کی تعلیم دی گئی ہے جو اصلاح درستی کے اصول ہونے چاہئیں جن پر معاشرہ اور سماج کی تربیت کی جائے ان اصول کی تفسیر ان الفاظ میں کی جا سکتی ہے۔ الف : ایک دوسرے کا احترام سامنے بھی اور پیچھے بھی۔ ب : دلوں کی صفائی۔ ج : آگے بڑھنے اور ترقی کرنے یعنی جذبۂ تقدم و ترقی میں اعتدال۔ د : قوت مقاومت، یعنی غلط کاروں کے مقابلہ کا حوصلہ اور تادیبی کار روائیوں کو عمل میں لانا