ماہنامہ انوار مدینہ لاہور مئی 2010 |
اكستان |
|
تقریظ وتنقید نام کتاب : دقائق السنن شرح اُردو جامع السنن (جلد اوّل) تالیف : شیخ الحدیث حضرت مولانا ڈاکٹر عبدالستار مروت صفحات : ٥٢٠ سائز : ٨/٣٠x٢٠ ناشر : حافظ تسکین اللہ مکتبہ صفدریہ حسن گڑھ پشاور صحاحِ ستّہ میں امام ترمذی رحمہ اللہ کی ''الجامع الصحیح'' کا جو دَرجہ ہے وہ کسی سے مخفی نہیں بِلااِختلاف ِ مسلک و مشرب تمام مدارس میں یہ کتاب پڑھی پڑھائی جاتی ہے اِسی لیے علماء ِ کرام قدیمًا وحدیثًا اِس کی طرف اعتناء فرماتے رہے ہیں اَور اِس کی عربی فارسی اَور اُردو میں بہت سی شروحات لکھی گئی ہیں ۔ زیرتبصرہ کتاب ''دقائق السنن'' بھی اِسی سلسلہ کی ایک کڑی ہے اِس وقت ہمارے سامنے اِس کی پہلی جلد ہے۔ مصنف کا طرز یہ ہے کہ وہ اُوپر جلی قلم متن دیتے ہیں اَور اِس پر اعراب بھی لگاتے ہیں اِس کے تحت مطلب خیز ترجمہ دیتے ہیں پھر اِس حدیث ِپاک کی تشریح کرتے ہیں، تشریح کے ضمن میں حل ِلُغات، اختلافِ نسخ، رفعِ تعارض، احوالِ رُواة، بیانِ مسالک، وجوہِ ترجیح وغیرہ پر تفصیل سے کلام کرتے ہیں۔ زبان و بیان سے ہٹ کر دیکھا جائے تو کتاب اپنے موضوع پر ایک اچھی کاوِش ہے اِس جلد میں ترمذی کے اَٹھارہ اَبواب جو مسواک تک پہنچتے ہیں اُن کی شرح لکھی گئی ہے خدا کرے کہ آگے بھی کام جاری ہو اَور تمام اَبواب کی شرح لکھی جائے۔