ماہنامہ انوار مدینہ لاہور مئی 2010 |
اكستان |
 |
اِسلام کی اِنسانیت نوازی ( حضرت مولانا مفتی محمد سلمان صاحب منصورپوری،اِنڈیا ) ماںباپ کا احترام : اِسلام نے اِنسانیت کے احترام کا مظاہرہ کرتے ہوئے خالق و مالک رب العا لمین کے حق کے بعد سب سے بڑا اَور اُونچا مرتبہ والدین کا متعین کیا ہے۔ اِسلام کی نظر میں یہ رشتہ اِنتہائی اہم اَور قابلِ عظمت ہے۔ قرآن میں جابجا والدین کے ساتھ حسنِ سلوک کی تعلیم دی گئی ہے۔ ایک جگہ اِرشاد ہے : وَقَضٰی رَبُّکَ اَلَّا تَعْبُدُوْآ اِلَّا اِیَّاہُ وَبِالْوَالِدَیْنِ اِحْسَانًا ط اِمَّا یَبْلُغَنَّ عِنْدَکَ الْکِبَرَ اَحَدُھُمَآ اَوْکِلٰھُمَا فَلَا تَقُلْ لَّھُمَآ اُفٍّ وَّلَا تَنْھَرْھُمَا وَقُلْ لَّھُمَا قَوْلًا کَرِیْمًاo وَاخْفِضْ لَھُمَا جَنَاحَ الذُّلِّ مِنَ الرَّحْمَةِ وَقُلْ رَّبِّ ارْحَمْھُمَا کَمَا رَبَّیٰنِیْ صَغِیْرًاo( سُورہ بنی اسرائیل ٢٣ـ٢٤) اَورحکم کرچکا تیرا رب کہ نہ عبادت کرو اُس کے سوائے اَور ماں باپ کے ساتھ بھلائی کرو، اور اگر پہنچ جائیں بڑھاپے کو ایک اُن میں سے یا دونوں تو نہ کہہ اُن کو ''ہوں'' اور نہ جھڑک اُن کو، اور کہہ بات اُن سے اَدب کی، اَور جُھکا دے اُن کے آگے کندھے عاجزی کرکے نیاز مندی سے، اور کہہ اَے رب ! اِن پررحم کر جیسا پالا اِنہوں نے مجھ کو چھوٹا سا۔ والدین کے حقوق کے بارے میں جناب رسولِ اکرم ا نے بھی اہم ہدایات اِرشاد فرمائی ہیں، چند اَحادیث ِطیبہ ذیل میں درج ہیں : (١) حضرت ابواُمامہ ص فرماتے ہیںکہ ایک شخص نے آنحضرت ا کے پاس آکر عرض کیا کہ اے اللہ کے رسول ا ! والدین کا اَولاد پر کیا حق ہے ؟ تو آنحضرت ا نے فرمایا کہ وہ تمہاری جنت یا جہنم ہیں (یعنی اگر اِن کو خوش رکھوگے توجنت کے مستحق ہوگے اَور اگر ناراض کروگے تو جہنم کے مستحق ہوگے) ۔ (ابن ماجہ ٢/٢٦٠ الترغیب والترہیب٣/٢١٦)