ماہنامہ انوار مدینہ لاہور جولائی 2005 |
اكستان |
|
بعض لوگ قرآن پا ک پڑھنا چاہتے ہیں لیکن الفاظ باوجود کوشش کے ادا نہیں کرپاتے ،اُن کے بارے میں بخاری ومسلم میں روایت آئی ہے۔ وَالَّذِیْ یَتَتَعْتَعُ فِیْہِ وَھُوَ عَلَیْہِ شَآق لَّہ اَجْرَانِ ۔ (مسلم ص٢٦٩ج١) '' وہ آدمی جسے ادائیگی میں دُشواری ہوتی ہے اوراُس میں مشقت اُٹھاتا ہے، اُس کودُہرا اجرملتا ہے ''۔ یہ دین سب ہی کے لیے ہے عربی ہوں یا عجمی کم استعداد کے ہوں یا کامل استعداد کے اس لیے ثواب بھی سب ہی کے لیے ہوگا ۔ قرآن پا ک کی تلاوت سے ہر صدمہ میں سکون میسر آتا ہے۔ حضرت اُسَیْد بن حضیر کو تو سکینہ متشکل بھی نظر آیا تھا جو بخاری ومسلم شریف وغیرہ کی صحیح احادیث میں بیان فرمایا گیاہے۔( مسلم ص٢٦٩ ج ١) مختلف سورتوں اور آیتوں کے یاد کرنے اورتلاوت کرتے رہنے کی احادیث میں جا بجا تعلیم دی گئی ہے ایک صحابی کو سورہ قل ھواللہ سے بہت محبت تھی ۔ ارشاد فرمایا : اِنَّ حُبَّکَ اِیَّاہُ اَدْخَلَکَ الْجَنَّةَ تمہیں اس کی محبت جنت میں داخل کرائے گی۔ آیت الکرسی سورہ بقرہ کی آخری آیات کی بہت فضیلتیں بیان کی گئی ہیں ۔ پوری سورہ بقرہ اور سورہ اٰل عمران کے بارے میں فرمایا گیا ہے کہ اللہ کے دربار میں اپنے پڑھنے والے کی طرف عذاب سے مدافعت کریں گی۔قل ھواللہ احد ،قل اعوذبرب الفلق ، قل اعوذبرب الناس کی فضیلتوں میں یہ بھی ہے کہ رسول اللہ ۖ سوتے وقت اِنہیں پڑھ کر اپنے مبارک ہاتھوں پر دم کرکے پورے جسم ِاطہر پر ہاتھ پھیر لیا کرتے تھے ۔اس عمل میں پیروی سنت کے ساتھ ساتھ اوربھی فوائد ہیں۔ سورۂ یٰسین ، سورہ دخان ، سورہ ملک کی فضیلتیں بیان فرمائی گئی ہیں ۔ سورہ ملک عذابِ قبر سے بچاتی ہے سورہ ملک روزانہ پڑھنی علماء سلف کامعمول چلا آرہا ہے ۔سورۂ کہف کی شروع کی تین آیتیں پڑھنے والا شخص دجال سے محفوظ رہے گا۔ اس سے سمجھ میں آتا ہے کہ ان آیات کے پڑھنے سے مکروفریب اورچھوٹے دجالوں سے بھی انشاء اللہ حفاظت میں رہے گا ۔