ماہنامہ انوار مدینہ لاہور جولائی 2005 |
اكستان |
|
یاد گارِ اسلاف ( عمر فاروق احمد پوری، متعلم جامعہ مدنیہ جدید،درجہ سابعہ ) وہ جامعہ مدنیہ جدید رائیونڈ روڈلاہور کی وسیع وعریض مسجد میں بیان فرمارہے تھے، اُن کی باتوں میں نہ منطق وفلسفہ بگھارا گیا تھا ، نہ ہی عرف ِعام کا گھن گرج والا زورِ بیان، وہ نرم دم گفتگو میں الفاظ کا نستعلیق ِتلفظ جگا کر سامعین کو رُوحانیت کے ایک جہاں سے آشنا کرا رہے تھے۔ وہ جب کسی موضوع پر بولتے تو علمی بحثیں صحراء کی طرح کھلتی چلی جاتیں، اُن کے بیان کا بنیادی محور'' دیوبند اورعلماء دیوبند ''تھا۔ وہ طلبہ کو اپنے اسلاف کا کردار اور اُن کے کارنامے بتارہے تھے ۔ وہ فرمارہے تھے کہ ''گزشتہ ڈیڑھ صدی میںاللہ جل شانہ نے علماء دیوبندسے دین کے مختلف شعبوں میں جو کام لیا ، دُنیا کے کسی اورخطہ میں اُس کی نظیر نہیں ، دعوت و تبلیغ، تصنیف وتالیف ،تدریس وتحقیق اوراسلامی علوم کی نشر واشاعت کے ساتھ ساتھ بر صغیر کے مسلما نوں کے اسلامی تشخص کوباقی رکھنے کے لیے جوعظیم جدوجہد علماء دیوبند نے کی ہے اورسرمایہ ملت کی نگہبانی کا حق جو انہوں نے ادا کیا ہے، وہ ہند کی اسلامی تاریخ کا ایسا زریں باب ہے جس سے کوئی مؤرخ صرف نظر نہیں کرسکتا ۔ ١٨٥٧ء کی جنگ آزادی کے بعد اسلامی علوم کی حفاظت اور مسلمانوں کے وجود کی بقاء کی غرض سے اللہ کے چند مخلص اورمقبول بندوںنے بڑی بے سروسامانی کی حالت میں دارالعلوم دیوبند کی بنیاد ١٥ محرم ١٢٨٣ھ/ ٣٠مئی ١٨٦٦ء کو رکھی ۔ محمود نام کے ایک اُستاذ اورایک شاگرد سے شروع ہونے والے اِس ادارے کو اللہ نے بارآور بنایا اور اِس کے برگ وثمر سے آج تک مسلمانانِ برصغیر فیضیاب ہورہے ہیں ۔وہاں سے فیض اُٹھانے والے علماء نے قریہ قریہ بستی بستی مدارس کھولے ، قرآنی مکاتب شروع کیے ، مسجدوں کو آباد کیا، فتنوں کا تعاقب کیا، قرآن وسنت کی صدا لگائی اوربتکدۂ ہند کے سناٹوں کو توحید کی دلکش اذانوں سے گرمایا ''۔ حضرت والا طلبۂ کرام کو اپنے اسلاف کی دینی خدمات بتا رہے تھے، اب آپ سوچ رہے ہوں گے کہ یہ شخصیت کون ہے؟ جی ہاں یہ ہیں نامور عالم دین حضرت اقدس مجاہدالحسینی صاحب دامت برکاتہم العالی ۔حضرت گزشتہ دنوں جامعہ مدنیہ جدید میں تشریف لائے اور اُستاذ محترم حضرت اقدس مولانا محمدحسن صاحب مدظلہم نے اُن سے بیان کرنے کی خواہش ظاہر کی ۔ حضرت نے طلبہ سے بیان فرمایا ،بیان کے بعد سوال وجواب کا سلسلہ شروع ہوا جس میں اساتذہ اورطلبہ نے حضرت سے خوب استفادہ کیا ۔