ماہنامہ انوار مدینہ لاہور جولائی 2005 |
اكستان |
 |
سلسلہ نمبر١٣ ''الحامد ٹرسٹ''نزد جامعہ مدنیہ جدید رائیونڈ روڈ لاہورکی جانب سے شیخ المشائخ محدثِ کبیر حضرت اقدس مولانا سیّد حامد میاں صاحب رحمة اللہ علیہ کے بعض اہم خطوط اور مضامین کو سلسلہ وار شائع کرنے کا اہتمام کیا گیا ہے جو تاحال طبع نہیں ہوسکے جبکہ ان کی نوع بنوع خصوصیات اس بات کی متقاضی ہیں کہ افادۂ عام کی خاطر اِن کو شائع کردیا جائے۔ اسی سلسلہ میں بعض وہ مضامین بھی شائع کیے جائیں گے جو بعض جرا ئد و اخبارات میں مختلف مواقع پر شائع ہو چکے ہیں تاکہ ایک ہی لڑی میں تمام مضامین مرتب و یکجا محفوظ ہو جائیں۔(ادارہ) قرآن پاک سے تعلق اور اُس کی برکا ت تحریر فرمودہ : ١٨ ربیع الاول ١٣٩٦ھ/٢٠مارچ ١٩٧٦ئ ( نظر ثانی و عنوانات : مولانا سےّد محمود میاں صاحب ) الحمد للّٰہ رب العالمین والصلٰوة والسلام علی خیر خلقہ سیّدنا ومولانا محمد وآلہ واصحابہ اجمعین امابعد ! فضیلت قرآن کریم اس درجہ زیادہ آئی ہے کہ جو آدمی قرآن پاک بغیر ترجمہ جانے بھی پڑھے یا سنے اُسے ثواب حاصل ہوتا ہے، اورسمجھ کر پڑھنے پر اور بھی زیادہ ہوتا ہے ۔حضرت ابوذرغفاری رضی اللہ عنہ نبی کریم علیہ السلام سے روایت فرماتے ہیں : اِنَّکُمْ لَا تَرْجِعُوْنَ اِلیَ اللّٰہِ بِشَیٍٔ اَفْضَلَ مِمَّا خَرَجَ مِنْہُ یَعْنِی الْقُرْاٰنَ ۔ (رواہ الحاکم وقال ہذا حدیث صحیح الاسناد ولم یخرجاہ مستدرک ص٥٥٥ ج١) ''تم اللہ کے دربار میں اُس چیز سے بڑی افضل کوئی چیز لے کر پیش نہیں ہو سکتے جو اُس کی ذاتِ پاک سے ظہور میں آئی ہو یعنی قرآن پاک''۔