ماہنامہ انوار مدینہ لاہور مئی 2016 |
اكستان |
 |
علمی مضامین سلسلہ نمبر١٠ ( قسط :٥) ''خانقاہِ حامدیہ''نزد جامعہ مدنیہ جدید رائیونڈ روڈ لاہورکی جانب سے محدث ، فقیہ، مؤرخ، مجاہد فی سبیل اللہ،مؤلف کتب کثیرہ شیخ الحدیث حضرت اَقدس مولانا سیّد محمد میاں صاحب رحمة اللہ علیہ کے بعض اہم مضامین جو تاحال طبع نہیں ہوسکے اُنہیں سلسلہ وار شائع کرنے کا اہتمام کیا گیا ہے جبکہ اُن کی نوع بنوع خصوصیات اِس بات کی متقاضی ہیں کہ اِفادۂ عام کی خاطر اُن کو شائع کردیا جائے۔ اِسی سلسلہ میں بعض وہ مضامین بھی شائع کیے جائیں گے جو بعض جرا ئد و اَخبارات میں مختلف مواقع پر شائع ہو چکے ہیں تاکہ ایک ہی لڑی میں تمام مضامین مرتب و یکجا محفوظ ہو جائیں۔ (اِدارہ) دورِ حاضر کے سیاسی اور اِقتصادی مسائل اور اِسلامی تعلیمات و اِشارات ( حضرت اَقدس مولاناسیّد محمد میاں صاحب ) فرد کی مِلکیت ،تقسیمِ دولت اور تہذیب ِاَخلاق : اِنفرادی مِلکیت کو اِسلام تسلیم کرتا ہے مگر اِس لیے نہیں کہ وہ صاحب ِ اِیمان کو پونجی پتی بنانا چاہتا ہے یا سر مایہ داری سے اِس کو محبت ہے ۔ فرد کی ملکیت کو اِسلام نے اِس لیے تسلیم کیا ہے کہ اِنسانیت کا جو ہر نکھرے اور شرفِ اِنسانیت کی وجہ اور اِنسانی عظمت کی علت مشاہدہ بن کر سامنے آئے اَخلاق کی بلندی اِنسانیت کا جو ہر ہے اِسلام فرد کو اِس لیے مالک بناتا ہے کہ وہ مکارمِ اَخلاق سے آراستہ ہو۔بخل، خود غرضی، تنگ نظری، حرص، طمع، حسد وہ ذلیل اورکمینہ خصلتیں ہیں جو شرفِ اِنسانیت سے میل نہیں کھاتیں