ماہنامہ انوار مدینہ لاہور جنوری 2014 |
اكستان |
|
قسط : ١ اِسلام کیا ہے ؟ ( حضرت مولانا محمد منظور صاحب نعمانی رحمة اللہ علیہ ) ہر مسلمان کے لیے اِسلامی تعلیم حاصل کرنے کی ضرورت اور دین سیکھنے کی فضیلت : بھائیو !اِتنی بات تو آپ سب جانتے ہوں گے کہ اِسلام کسی قوم اور ذات برادری کا نام نہیں ہے کہ اِس میں پیدا ہوانے والا ہر آدمی اپنے آپ مسلمان ہو اور مسلمان بننے کے لیے اِس کو کچھ کرنا نہ پڑے جس طرح شیخ یاسیّد خاندان میں پیدا ہونے والا ہر بچہ خود بخود شیخ یاسیّد ہوجاتا ہے اور اُس کو شیخ یاسیّد بننے کے لیے کچھ کرنا نہیں پڑتا بلکہ اِسلام نام ہے اُس دین کا اور اُس طریقہ پر زندگی گزارنے کا جو اللہ کے سچے رسول ۖ اللہ تعالیٰ کی طرف سے لائے تھے اور جو قرآن شریف میں اور رسول اللہ ۖ کی حدیثوں میں بتلایا گیا ہے۔ پس جوکوئی اِس دین کو اِختیار کرے اور اُس طریقے پر چلے وہی اصلی مسلمان ہے۔ اور جو لوگ نہ اِس دین کو جانتے ہیں اور نہ اُس پر چلتے ہیں وہ اصلی مسلمان نہیں ہیں پس معلوم ہوا کہ اصلی مسلمان بننے کے لیے دو باتوں کی ضرورت ہے۔ (١) ایک یہ کہ ہم دین ِ اِسلام کو جانیں اور کم اَز کم اُس کی ضروری اور بنیادی باتوں کا ہمیں علم ہو۔ (٢) دُوسرے یہ کہ ہم اُن کو مانیں اور اُن کے مطابق چلنے کا فیصلہ کریں اِسی کا نام اِسلام ہے اور مسلمان ہونے کا یہی مطلب ہے۔ پس اِسلام کا علم حاصل کرنا (یعنی دین کی ضروری باتوں کا جاننا) مسلمان ہونے کی سب سے پہلی شرط ہے اِسی لیے حدیث شریف میں آیا ہے طَلَبُ الْعِلْمِ فَرِیْضَة عَلٰی کُلِّ مُسْلِمٍ (اِبن ماجہ و بیہقی) یعنی علم دین حاصل کرنے کی کوشش اور طلب ہر مسلمان پر فرض ہے۔