ماہنامہ انوار مدینہ لاہور اپریل 2013 |
اكستان |
 |
علمی مضامین سلسلہ نمبر٦١ ''اَلحامد ٹرسٹ''نزد جامعہ مدنیہ جدید رائیونڈ روڈ لاہورکی جانب سے شیخ المشائخ محدثِ کبیر حضرت اَقدس مولانا سیّد حامد میاں صاحب رحمة اللہ علیہ کے بعض اہم خطوط اور مضامین کو سلسلہ وار شائع کرنے کا اہتمام کیا گیا ہے جو تاحال طبع نہیں ہوسکے جبکہ ان کی نوع بنوع خصوصیات اس بات کی متقاضی ہیں کہ افادۂ عام کی خاطر اِن کو شائع کردیا جائے۔ اسی سلسلہ میں بعض وہ مضامین بھی شائع کیے جائیں گے جو بعض جرا ئد و اخبارات میں مختلف مواقع پر شائع ہو چکے ہیں تاکہ ایک ہی لڑی میں تمام مضامین مرتب و یکجا محفوظ ہو جائیں۔ (اِدارہ) جہاد کی اِبتداء ،مقاصد ِجہاداَور اُس کی غایت ''جنگ '' اَور ''جہاد ''میں فرق اَلْحَمْدُ لِلّٰہِ رَبِّ الْعَالَمِیْنَ وَالصَّلٰوةُ وَالسَّلَامُ عَلٰی خَیْرِ خَلْقِہ سَیِّدِنَا وَمَوْلَانَا مُحَمَّدٍ وَّاٰلِہ وَاَصْحَابِہ اَجْمَعِیْنَ اَمَّابَعْدُ ! آج آپ حضرات سے بواسطہ تحریر مخاطب ہو رہا ہوں اَور اِس میں ایک فائدہ بھی پیش ِنظر ہے کہ تحریر کی اِفادیت تقریر سے زیادہ اَور دیر پا ہے اللہ تعالیٰ قبول فرمائے اَور نافع بنائے۔ جس دَور سے ہم گزر رہے ہیں وہ نہایت پُر خطر ہے دُنیا بھر میں بے چینی پائی جا رہی ہے اَمن و سکون مفقود ہے۔ ترقی یافتہ ممالک ہوں یا ترقی پذیر ،داخلی اُمور ہوں یا خارجی سب پُر خلل ہیں اَمیر ترین طبقہ ہو یا غریب سب بے سکونی کے شکار ہیں ،فروغِ عقل وترقی وبال بنی ہوئی ہے کیونکہ علم و عقل کابے محل اِستعمال ہو رہا ہے جوہری طاقت کا رُخ تباہ کاری کی طرف ہے اَور قدم بقدم بڑھتا ہی جارہا ہے۔ علم ہی ٹھہرا علم کا باغی عقل ہی نکلی عقل کی دُشمن آج دُنیا میں مادّی واِقتصادی ترقی اَقوامِ عالم کا مقصود بن کر رہ گئی ہے اِنسانیت کی فلاح کسی کا مقصد نہیں رہا۔ اِسی محور پر صلح وجنگ اَور توسیع پسندی کی گردش چل رہی ہے بڑی طاقتوں کے عِفریت کرہ اَرضی اَور بنی نوعِ اِنسان کو اَپنا بازیچہ بنائے ہوئے ہیں۔ حقوق دِلانا، مدد کرنا ،اِنصاف پسندی