ماہنامہ انوار مدینہ لاہور اپریل 2013 |
اكستان |
 |
فقہاء نے اِس کو خوب سمجھا ہے لکھتے ہیں کہ اَگر شراب کی طرف فرحت کے لیے نظر کرے تو حرام ہے کیونکہ قاعدہ ہے کہ اچھی چیز کو دیکھ کر رغبت ہوتی ہے۔ ناجائز تصویر اَور فوٹو سے پردہ : تصویروں کے ذریعے لذت حاصل کرنے کی قباحت (وممانعت) میں کسی کو کلام نہیں، اگرچہ نیک لوگوں کی تصویر ہوں اَور اگرچہ اِس تصویر کی طرف کوئی اَور مکروہ (نازیبا حرکت) بھی منسوب نہ ہو محض تفریح و لذت ہی کے لیے ہو (تب بھی ناجائز ہے) کیونکہ محرمات ِ شرعیہ سے نظر (یعنی نگاہ) کے ذریعہ سے بھی لذت حاصل کرنا حرام ہے فِی الدُّرِّ الْمُخْتَارِ کِتَابُ الْاَشْرِبَةِ وَحَرُمَ الْاِنْتِفَاعُ بِالْخَمْرِ وَلَوْ لِسَقِیِّ دَوَابٍ اَوْ لِطِیْنٍ اَوْ نَظْرٍ لِلتَّلَھِیْ۔ شریعت اِسلامیہ میں جاندار کی تصویر بنانا مطلقًا گناہ ہے خواہ کسی کی تصویر ہو۔ اَحادیث ِصحیحہ کی رُو سے تصویر بنانا رکھنا سب حرام ہے اَور اِس کو زائل کرنا، مٹانا اَور ختم کرنا واجب ہے اِس لیے کہ یہ معاملات سخت گناہ کے ہیں۔ فقہاء کی اِحتیاط اَور چند اہم مسائل : فقہاء حکماء ِ اُمت ہیں اُنہوں نے جوان عورتوں کو سلام کرنے تک کو منع لکھا ہے۔ فقہاء نے یہاں تک اِحتیاط کی ہے لکھتے ہیں کہ اَجنبی عورت کی چادر کو دیکھنا حرام ہے۔ نامحرم کا جھوٹا کھانے کا حکم : اَور بعض فقہاء نے یہ بھی لکھا ہے کہ عورت کو اَجنبی مرد کا جھوٹا کھانا جائز نہیں (اِس طرح مرد کو اَجنبی عورت کا جھوٹا کھانا جائز نہیں) کیونکہ اِس کھانے سے بھی رغبت ہوتی ہے ۔میں نے اِس کا یہ اِنتظام کر رکھا ہے کہ جو کھانا بچا ہوا گھر میں جاتا ہے اَگر معلوم نہ ہو کہ کس کا کھایا ہوا ہے تب تو کھالو ورنہ مت کھاؤ۔ اَور بعض فقہاء نے یہاں تک لکھا ہے کہ بھتیجی کو چچا سے علیحدہ رہنا چاہیے گو وہ خود محرم ہے مگر اَپنے لڑکوں کے لیے پسند کرنے کے واسطے سے اِس پر نظر کرے گا۔ (حسن العزیز ملحضًا )