ماہنامہ انوار مدینہ لاہور دسمبر 2012 |
اكستان |
 |
سیّد صاحب نے جب دوآبہ کا دورہ فرمایا تھا تو اُسی وقت دیوبند ١ کے بڑے خاندانی حضرات آپ کے ساتھ ہوگئے تھے۔ دارُالعلوم دیوبند کے نزدیک جانب ِمشرق قاضی مسجد واقع ہے اِسی مسجد میں حضرت سیّد صاحب فروکش ہوئے تھے، یہاں دَس روز تک قیام فرمایا۔ ''سیّد اَحمد شہید'' میں لکھا ہے : سیّد صاحب پُھلت (جو حضرت شاہ ولی اللہ صاحب )کا ننہیالی وطن ہے ،سے مظفر نگر ہوتے ہوئے دیوبند پہنچے، دیوبند سے اِملِیَا (جو دیوبند سے تین میل کے فاصلہ پر جانب ِجنوب واقع ہے) گئے۔ اِن مقامات میں قاضی نجم الدین پندرہ آدمیوں کے ساتھ سیّد مقبول ،مولوی شمس الدین، قاضی عظیم اللہ، شیخ رجب علی، اُن کے فرزند منور علی ،حافظ عبداللہ ، اُن کے بھائی نظام الدین اَور کریم الدین نیز اُن کے والد اِمام بخش، کرامت حسین، محمد ماہ شیخ چاند، مولوی فریدالدین، مولوی بشیر اللہ ،سیّد محمد حسین وغیرہ اصحاب نے بیعت کی، اِن حضرات میں سے جو حضرات سیّد صاحب کی خدمت میں پیش پیش رہے اُن کے اسمائِ گرامی تو ملتے ہیں لیکن مفصل حالات نہیں ملتے جن حضرات کے حالات معلوم ہوسکے وہ دَرج کیے جاتے ہیں۔ (١ ) سیّد مقبول : اِن کا پورا نام سیّد مقبول عالم ٢ ہے۔ دیوبند کے خاندانِ سادات سے تھے۔ اِن کے مورث ِاَعلیٰ بندگی سیّد محمد اِبراہیم ہیں جن کا ذکر مفصل گزر چکا ہے۔ ١ دیوبند کا علاقہ قدیم زمانہ میں ''مدہ دیش'' کہلاتا تھا۔ شمالی ہند کی راجگان کی راج دھانی جب تک ''ہستناپور'' (ضلع میرٹھ) رہی یہ علاقہ اُس کے ماتحت رہا پھر مہا بھارت کی جنگ میں کورو کی شکست کے بعد اَندر پرست (دہلی) کے مہاراجگان کی مملکت میں شامل ہو گیا ۔قدیم اہمیت کی بناء پر بھی شاید میرٹھ کو ہمیشہ چھاؤنی رکھا گیا ہے۔ مسلمانوں کے دَورِ حکومت میں دیوبند وغیرہ کے علاقوں میں اَعلیٰ ترین خاندانوں نے جو صاحب رُوحانیت و علم و فضل تھے آبادی اِختیار کی۔ اَشرف السوانح میں ہے ''جیسے اِس گرد ونواح میں مسلمان شرفا کے بڑے بڑے قصبے ہیں مثلًا دیوبند، گنگوہ، کیرانہ، جھن جھانہ، کاندھلہ اَور پانی پت وغیرہ ویسے ہندوستان میں کہیں اَور نہیں پائے جاتے اَور جتنی دینداری اَور جتنا علم کا چرچا اِن اَطراف میں ہے، اِتنا اَور کہیں نہیں دیکھا گیا اَور جس کثرت سے بڑے بڑے علماء و فضلاء و مشائخ اِس حصہ ملک میں گزرے ہیں اَور موجود ہیں اِتنے اَور کہیں نہیں۔''( اَشرف السوانح جلد اَوّل ص ١٥ طبع اَوّل ) ٢ حافظ سیّد مقبول عالم اِبن سیّد محمد عالم اِبن سیّد محمد جمیل اِبن محمد اِسماعیل اِبن سیّد محمداِبراہیم رحمة اللہ علیہم۔