ماہنامہ انوار مدینہ لاہور دسمبر 2010 |
اكستان |
 |
حرف آغاز نحمدہ ونصلی علی رسولہ الکریم امابعد! بہت عرصہ ہوا یہ بات سنتے چلے آ رہے ہیں کہ ہر گلی ہر محلہ میں سود خوری اَور سٹہ بازی عروج پر ہے اَور اَب کچھ عرصہ سے اَخبارات میں بھی ایسی خبریں نظر سے گزرتی رہتی ہیں ،اللہ ہر مسلمان کو اِن سود خوروں کے شکنجے سے بچائے۔ ٢٠نومبر کی بات ہے ایک مجلس میں سود خور سے واسطہ پڑا اُس نے اپنے محلہ دار کو دو لاکھ چونتیس ہزار کا قرض ماہانہ سود پر دیا اَور ہر ماہ کی اِبتداء پر اُنتالیس ہزار روپے سُود کے ہتھیا لیتا ،اَب تک تین قسطوں میں ایک لاکھ سترہ ہزار روپے لے چکا تھا،قرض داروں کی حالت دِن بدن بد سے بدتر ہوتی جارہی تھی اَور یہ دَرندہ صفت ساہوکار اپنے کو قرض داروں کا محسن تصور کرتے ہوئے اچھے اَور نجات دہندہ پڑوسی کا تأثر دیتا رہا۔ ہمارے ساتھ ہونے والی نشست میں اُس سود خور کی رقم اَدا کی جانی تھی مگر اِس سے پہلے اَمر بالمعروف اَور نہی عن المنکر کا خیال کرتے ہوئے بندہ نے اُس کو بہت سمجھایا کہ تم اپنے قرض سے اِتنی رقم لے چکے ہو اَب صرف بقیہ رقم میں تمہارا حق بنتا ہے کُل کا نہیں ،ترغیب بھی دی ترہیب سے بھی کام لیا مگر کسی نصیحت کا اُس پر کوئی اَثر نہ ہوا وہ بڑی بے شرمی سے بات سے بات نکالتے ہوئے اپنے مطالبہ پر قائم رہا۔ فی الوقت صرف لاہور شہر میں لاکھوں سُودخور ایسے ہی ہیں جو گلی محلوں میں جانتے بوجھتے اِس گناہ کے کام کو اَنجام دے رہے ہیں ،سرکار کے اَنگریزی قانون میں بھی اِن پر کوئی روک ٹوک نہیں ہے غریب و لاچار اِن کے رحم و کرم پر ہیںسَو جو کام یہود و نصارٰی کیا کرتے ہیں وہ کام حضرت محمد رسول اللہ ۖ کے اُمتی کہلانے والے اَنجام دے رہے ہیں حالانکہ قرآنِ پاک اَور حدیث شریف میں سودی عمل کی سخت ترین الفاظ میں مذمت کی گئی ہے۔