ماہنامہ انوار مدینہ لاہور فروری 2013 |
اكستان |
|
(٢) محترمی جناب بشیر اَحمد صاحب السلام علیکم ورحمة اللہ وبرکاتہ آپ کا جوابی گرامی نامہ نہ معلوم کہاں گشت کرتا رہا پورے ایک چلہ میں جواب کی جگہ پر پہنچا آپ یقینًا ایک عرصہ تک اِنتظار کر کے نااُمید ہوگئے ہوں گے۔ آپ کے مدرسہ کا مفصل حال معلوم ہوا بڑی مسرت ہوئی اللہ تعالیٰ آپ کے مدرسہ کو ترقیات سے مالا مال فرمائیں ،شرور وفتن سے محفوظ فرمائیں،مرضیات پر چلنا آسان فرمائیں،نامرضیات سے حفاظت فرمائیں۔ آپ کے خط کے بعض اَجزاء میں تو آپ کا مؤید ہوں اَور میرا اِس سلسلہ میں کئی سال ہوئے ایک خط مکاتب کی ضرورت کے اِعتبار سے بہت سے رسالوں میں طبع ہوا، زیادہ تعجب اِس پر ہے کہ میری بے ربط تحریر کو دارُالعلوم دیوبند کے رسالہ میں جگہ عطا کی گئی اَور پھر مظاہرِعلوم کے رسالہ میں بھی شائع ہوا، تعمیر حیات میں بھی طبع ہوا، ریاض الجنہ گرینی میں بھی اِس کی اِشاعت ہوئی نیز پڑوسی ملک کے کئی رسالوں میں اِس کو جگہ دی گئی ،اِس وقت تو یہ رسالہ سلوک و اِحسان بہادر آباد کراچی جو حضرت شیخ نور اللہ مرقدہ کے ایک خلیفہ نے مدرسہ قائم کیا ہے اَور اُنہوں نے اپنے مدرسہ سے سلوک و احسان رسالہ سلوک کی اہمیت کی خاطر مدرسہ سے شائع کرنا شروع کیا اَور اِس میں بہت سے اَکابر کے مفید مضامین آتے رہتے ہیں، کیا اچھا ہو آپ اِس رسالہ کو اَپنے مدرسہ کے لیے جاری کراکر اَو ر اِس کے مفید مضامین کو معمولًا طلباء کو سنانے کا اہتمام کریں،اِنشاء اللہ طلباء کے لیے اِس کے مضامین مفید اَور نافع ہوں گے۔