ماہنامہ انوار مدینہ لاہور مارچ 2012 |
اكستان |
|
تقریظ و تنقید نام کتاب: اِختلافِ فقہاء میں حدیث کا کردار تالیف : شیخ محمد عوامہ، حفظہ اللہ ترجمہ:مولانا مفتی اِنعام اللہ صاحب صفحات:٣٠٢ سائز :١٦/٣٦x٢٣ناشر:مکتبہ الحرمین اَلحمد مارکیٹ، اُردو بازار لاہور قیمت:رعایتی ١٥٠ روپے پیش ِنظر کتاب ''اِختلاف ِ فقہاء میں حدیث کاکردار'' شیخ محمد عوامہ مدنی دامت برکاتہم کی کتاب ''اَثر الحدیث الشریف فی اِختلاف الا ئمة الفقہائ'' کا ترجمہ ہے جو مفتی اِنعام اللہ صاحب نے کیا ہے، اِس کتاب میں شیخ عوامہ نے یہ بتلایا ہے کہ ائمہ مجتہدین کے درمیان مسائل میں جو اِختلاف نظر آتا ہے اُس کے مختلف اَسباب ہیں جن میں سے ایک بڑا سبب اَحادیث کا اِختلاف ہے، ایک مجتہد نے ایک حدیث کو لیا دُوسرے نے دُوسری حدیث کو، اِس بناء پر بظاہر دونوں مجتہدوں میں اِختلاف ہو گیا، اَب دیکھنے میں دونوں مجتہد اَلگ اَلگ نظر آتے ہیں لیکن حقیقت میں دونوں کا عمل حدیث پر ہے اَور دونوں ماجور من اللہ ہیں۔ اَب رہی یہ بات کہ خود اَحادیث میں اِختلاف کیوں ہوتا ہے تو اِس کے بھی مختلف اَسباب ہوتے ہیں جنہیں شیخ نے اپنی کتاب میں تفصیل سے ذکر کیا ہے۔ اِس موضوع پر شیخ الحدیث حضرت مولانا محمد زکریا صاحب کا رسالہ ''اِختلاف الائمہ'' بھی بہت عمدہ رسالہ ہے۔ شیخ عوامہ زید مجدہم کی کتاب اپنی جگہ ایک عمدہ کاوِش ہے مکتبہ الحرمین نے اچھا کیا کہ اِس کا ترجمہ چھاپ دیا اِس سے اُردو دَان طبقہ کو ضرور فائدہ ہوگا۔