ماہنامہ انوار مدینہ لاہور جولائی 2011 |
اكستان |
 |
اَنفَاسِ قدسیہ قطب ِ عالم شیخ الاسلام حضرت مولانا سیّد حسین احمدصاحب مدنی کی خصوصیات ( حضرت مولانا مفتی عزیز الرحمن صاحب بجنور ی ) فاضل دارُالعلوم دیوبند و خلیفہ مجاز حضرت مدنی مقاماتِ عالیہ یا اَخلاقِ باطنہ : اَخلاقِ باطنہ دَراصل ایک قوت ہے جو قلب ِاِنسانی پر منجانب اللہ فائز کی جاتی ہے جس کی وجہ سے اچھے اَطوار، خوش معاملگی اَور دُوسرے اَخلاقِ ظاہرہ کا ظہور ہوتا ہے گویا اَخلاقِ ظاہرہ پر تو اَور عکس ہوتے ہیں اَخلاقِ باطنہ کا ۔سخاوت، شجاعت، عدل و اِنصاف، شرم و حیاء ، ہمت وصبر و اِستقلال، خوددَاری واِستغناء وغیرہ وغیرہ اَور بہت سی صفات ِمحمودہ ہیں جن کو اَخلاقِ باطنہ میں شمار کیا جاتا ہے۔ حضرت شیخ الاسلام کے جہاں اَور اَوصافِ جلیلہ ہیں وہاں آپ کے اَخلاقِ باطنہ کا وہ مقام ہے کہ اُس کا اِدراک کرنے کے لیے بھی اُن ہی جیسی اِستعداد اَور کمالات کا آدمی ہونا چاہیے چنانچہ حضرت مولانا عبدالقادر صاحب رائے پوری (جو بڑے اَولیاء اللہ میں سے ہیں) اِرشاد فرماتے ہیں : بھائی !حضرت شیخ الاسلام کا ذکر کیا پوچھتے ہو، پہلے تو ہم یوں ہی سمجھتے رہے مگر وقت کی نزاکتوں اَور ہنگامہ آرائیوں میں جب ہم نے اُس مرد ِمجاہد کو آنکھ اُٹھاکر دیکھا تو حضرت شیخ مدنی کے جہاں قدم تھے وہاں پر اپنا سر پڑا دیکھا۔ اجی ! حضرت اِس وقت ہر دو منصب پر فائزالمرام ہیں (تکوینیات وتشریعات ) ۔''(مقدمہ مکتوبات ِشیخ الاسلام) حضرت مولانا اَشرف علی صاحب تھانوی اِرشاد فرماتے ہیں : ''اپنی جماعت میں مولانا مفتی کفایت اللہ صاحب کے حسنِ تدبر کا اَور مولا نا حسین احمد صاحب کے جوشِ عمل کا معتقد ہوں ۔(آگے فرماتے ہیں) بھائی میں اُن جیسی ہمت مردانہ کہاں سے لاؤں .......... الخ۔''( مقدمہ مکتوباتِ شیخ الاسلام)