ماہنامہ انوار مدینہ لاہور نومبر 2009 |
اكستان |
 |
اُمت ِمسلمہ کی مائیں قسط : ٩ حضرت عائشہ صدیقہ رضی اللہ تعالیٰ عنہا ( حضرت مولانا محمد عاشق الٰہی صاحب بلند شہری ) ایک بہت بڑا بہتان اور اللہ جلَّ شانہ' کی طرف سے براء ت کا اعلان : حدیث شریف کی کتابوں میں اَور خصوضاً بخاری شریف میں یہ واقعہ غیر معمولی تفصیل کے ساتھ ذکر کیا گیا ہے کہ جب حضرت رسول کریم ۖ غزوہ بنی المصطلِق کے لیے تشریف لے گئے تو بیویوں میں قرعہ ڈالا کہ کس کو ساتھ لے جائیں ۔ نتیجةً اُمہات المؤمنین میں سے حضرت عائشہ رضی اللہ عنہا کا نام نکل آیا اور معمول یہ تھا کہ حضرت عائشہ رضی اللہ عنہا اپنے ہودج ( پردہ دار شغدف )میں سوار ہو جاتی تھیں اور اِس ہودج کو اُٹھا کر اُونٹ پر رکھ دیا جاتا تھا ۔ غزوہ سے فراغت کے بعد مدینہ طیّبہ کو واپس ہوتے ہوئے ایک رات یہ واقعہ پیش آیا کہ قافلہ ایک منزل میںٹھہرااَور آخر شب میں (روانہ ہونے سے کچھ پہلے )اعلان کیا گیا کہ قافلہ روانہ ہونے والا ہے (تاکہ لوگ اپنی اپنی ضرورتوں سے فارغ ہوکر روانگی کے لیے تیار ہوجائیں) حضرت عائشہ رضی اللہ عنہا کو قضائے حاجت کی ضرورت تھی ۔اس سے فراغت کے لیے جنگل کی طرف ذرا فاصلہ پر چلی گئیں ۔ وہاں اِتفاقاً اُن کا ہار ٹوٹ کر گر گیا جس کے گرنے کا وہاںپتہ نہ چلا ۔اپنی جگہ پر واپس آئیں تو گلے میں ہار نہ پاکر اُس جگہ واپس گئیں جہاں ہار گرا تھا ۔اِس کی تلاش میں اُن کو دیر لگ گئی جب واپس اپنی جگہ پہنچیںتو دیکھا کہ قافلہ روانہ ہو چکا ہے جس اُونٹ پر سوار ہوا کرتی تھیں اُس کا قصّہ یہ ہوا کہ جب قافلہ روانہ ہونے لگا تو معمول کے مطابق حضرت عائشہ صدیقہ رضی اللہ عنہا کا ہودج یہ سمجھ کر کہ وہ اِس میں موجود ہیں اُونٹ پر سوار کر دیا گیا ۔اُٹھاتے وقت ذرا بھی اِس اَمر کا شبہ نہ ہوا کہ اِس میں حضرت صدیقہ رضی اللہ عنہا نہیںہیں کیونکہ وہ جسم کے اعتبار سے بھاری نہ تھیں ۔ معمولی خوراک کھاتی تھیں بدن میں معمولی سا بوجھ تھا اِس کی وجہ سے ہودج اُٹھانے والوںکو یہ اَندازہ ہی نہ ہوا کہ ہودج خالی ہے۔ چنانچہ اُونٹ کو ہانک دیا گیا ۔