ماہنامہ انوار مدینہ لاہور نومبر 2009 |
اكستان |
 |
حرف آغاز نحمدہ ونصلی علی رسولہ الکریم اما بعد! ملک عزیز ِ پاکستان اِن دِنوں جن حالات سے دو چار ہے ماضی میں شاید ہی ایسے حالات سے دو چار ہواہو، مختلف قسم کے بحرانوں نے اِس کی کمر توڑ رکھی ہے، بجلی کا بحران، چینی کا بحران، پانی کا بحران، غربت، مہنگائی، بے روز گا ری، اِحساس ِ محرومی ، قتل و غارت گری ،چوری ڈاکے، ہر سطح پر پائی جانے والی کرپشن، جگہ جگہ دہشت گردوں کے حملے ، حساس علاقوں میں خود کش دھماکے یہ سب ملک کا مقدر بن کر رہ گئے ہیں۔ سوچنے کا مقام ہے کہ آخریہ سب کچھ کیوں ہے؟ سیدھی سی بات ہے یہ دُنیا دار الاسباب ہے یہاں کا ہر کام کسی نہ کسی سبب سے مربوط ہے، ملک میں پائی جانے والی بے چینی، بد امنی، بد حالی و اَبتری ان سب کا اصل سبب یہ ہے کہ حکمران ہوں یا عوام سب نے اللہ کی ذات سے تعلق توڑ کر اللہ اور اللہ کے رسول ۖ کے دُشمنوں سے ناطہ جوڑ لیا ہے، عوام نے بے حیائی وبے غیرتی کی اِنتہا کر دی ہے ،حکمرانوں نے شرم و حیا کو بالائے طاق رکھ کر اَور ملکی مفاد سے بے پروا ہوکرغیروں سے بھیک مانگنے کے لیے کاسۂ گدائی ہاتھ میںلے رکھا ہے،یہود و نصارٰی چند ڈالر دینے کے لیے حکمرانوں کو تگنی کا ناچ نچوا رہے ہیں، جو وہ کہتے ہیں ہمارے حکمران وہی کچھ کرتے ہیں۔