ماہنامہ انوار مدینہ لاہور اگست 2009 |
اكستان |
 |
اچھا جب یہ سب مال ودولت ،اللہ تعالی کی عطا اور اُس کی دی ہوئی نعمت ہے تو انصاف کی بات تو یہ ہے کہ حصہ رسدی تمہارے پاس رہے، باقی سب اللہ کی مخلوق پر خرچ ہو ۔ دیکھو دریا کا پانی نالی کے راستے سے تمہارے کھیت میں پہنچتا ہے۔یہ نالی حصہ رسدی یا اِس سے کچھ زیادہ خود چُوس لیتی ہے باقی سارا پانی جُوں کا تُوں کھیتوں اور باغیچوں کو پہنچا دیتی ہے جو تشنہ لب ضرور ت مند ہوتے ہیں ۔اِسی طرح تم بھی اگر دولت مند ہو تو ایک چشمہ ہو ، ایک نہر ہو، اپنی پیاس بھر اپنے پاس رکھو باقی سب اللہ کی مخلوق پر صرف کردو جس کی زندگی کا چمن مُرجھا رہا ہے کیونکہ یہ مخلوق ''عیال اللہ '' ہے۔ مالک کی دی ہوئی نعمت اُس کے عیال پرصرف ہونی چاہیے ایمان کا تقاضا یہی ہے کھیت سُوکھ رہا ہوا ور تم چشمہ کے دہانہ پر پتھر کی چٹان رکھ دو یہ ایمان کی بات نہیں ہے بلکہ بہت بڑا ظلم ہے اور پرلے درجے کی سنگدلی ہے۔ چنانچہ اللہ تعالی کا اِرشاد ہے : اَلَّذِیْنَ یَکْنِزُوْنَ الذَّہَبَ وَالْفِضَّةَ وَلَا یُنْفِقُوْنَھَا فِیْ سَبِیْلِ اللّٰہِ فَبَشِّرْھُمْ بِعَذَابٍ اَلِیْمٍ o یَوْمَ یُحْمٰی عَلَیْھَا فِیْ نَارِ جَھَنَّمَ فَتُکْوٰی بِھَا جِبَاھُھُمْ وَجُنُوْبُھُمْ وَظُھُوْرُہُمْ ھٰذَا مَا کَنَزْتُمْ لِاَنْفُسِکُمْ فَذُوْقُوْامَاکُنْتُمْ تَکْنِزُوْنَ o (سورۂ توبہ آیت :٣٤ ۔ ٣٥ ) ُُُُ'' جو لوگ کنز کرتے ہیں (جوڑ جوڑکر رکھتے ہیں ) سونے اور چاندی کو اور راہِ خدا میں اُس کو خرچ نہیں کرتے ۔ اُن کو سُنا دو خبر درد ناک عذاب کی جس دن تاپا جائیگا اِس خزانے کو نارِ جہنم میں پھر اُس سے داغا جا ئے گا اُن کی پیشانیوںاور پہلوئوں کو اور کہا جائے گا یہ ہے وہ جس کو تم نے اپنے لیے جمع کرکے اور جوڑ کر رکھا تھا۔پس چکھو اپنے جوڑ ے ہوئے کو''۔ آنحضرت ۖ نے فرمایا : لَیْسَ بِالْمُؤْمِنِ الَّذِیْ یَشْبَعُ وَجَارُہُ جَائِع ۔(ترمذی شریف) ''وہ مسلمان نہیں جو خود پیٹ بھر لے اور پڑوسی بھوکا رہے''۔ ایک دفعہ ایک شخص نے سوال کیا یا رسول اللہ ۖ ایمان کیا ہے ؟ آپ نے فرمایا : اِفْشَآ ئُ السَّلَامِ وَاِطْعَامُ الطَّعَامِ وَالصَّلٰوةُ وَالنَّاسُ نِیَام ۔