Deobandi Books

ہجرت کی ہے۔ حضرت اسماء بنت عمیسؓ بھی ان ہی لوگوں کے ساتھ ہی حبشہ سے آئی تھیں، وہ ایک روز حضرت حفصہؓ کی ملاقات کو گئیں تو حضرت عمرؓ بھی آگئے اور انکو دیکھ کر پوچھا کہ یہ کون ہے؟ حضرت حفصہؓ نے جواب دیا کہ اسماء بنت عمیسؓ۔ اُنکا نام سنکر حضرت عمر نے فرمایا: یہ حبشیہ ہے؟ یہ بحریہ (یعنی سمندر کی رہنے والی) ہے؟ حضرت اسماءؓ بنت عمیس نے کہا کہ ہاں! ہم ہیں، اب حضرت عمرؓ نے کہا کہ ہم نے تم سے پہلے ہجرت کی ہے، ہم تم سے زیادہ رسول اللہﷺ کے مستحق ہیں۔ یہ سنکر حضرت اسماءؓ برہم ہوئیں اور کہا کہ عمر! تم غلط کہتے ہو، خدا کی قسم! تم رسول اللہﷺ کیساتھ رہتے تھے اور آپ بھوکوں کو کھانا کھلاتے تھے اور آپ جاہل کو نصیحت کرتے تھے۔ اور ہم، حبش کے دور ترین مبغوض زمین میں پڑے ہوئے تھے، ہم کو ایذا دی جاتی تھی، ہم خائف رہتے تھے اور یہ سب کچھ صرف خدا اور خدا کے رسول کی ذات کیلئے تھا۔ خدا کی قسم! تم نے جو کچھ کہا ہے، جب تک اسکا ذکر رسول اللہﷺ سے نہ کرلوں گی نہ کھاؤں گی، نہ پانی پیوں گی۔ خدا کی قسم! کسی قسم کا جھوٹ نہ بولوں گی، کجروی نہ اختیار کروں گی اور اس واقعہ میں کوئی اضافہ نہ کروں گی۔ چنانچہ جب آپ تشریف لائے تو انہوں نے اس واقعہ کو بیان کیا اور آپ نے اسکو سنکر فرمایا: وہ تم سے زیادہ میرے مستحق نہیں ہیں، عمر اور انکے اصحاب کی صرف ایک ہجرت ہے اور تم اہل کشتی کی دو ہجرتیں ہیں۔ حضرت اسماءؓ کا بیان ہے کہ ابو موسیٰؓ اور دوسرے کشتی والے جوق در جوق میرے پاس آتے تھے اور اس حدیث کو پوچھتے تھے، ان کے لیے دنیا کی کوئی چیز اس سے زیادہ مسر۔ّت خیز اور باعظمت نہ تھی۔ حضرت ابو موسیٰ بار بار مجھ سے اس حدیث کو پوچھتے تھے۔1 
فضیلت کی ایک بڑی وجہ محبتِ رسول ہے اور اس محبت کی وجہ سے بعض صحابیات کو وہ درجہ تقرّبِ رسول حاصل ہوا جو صرف مخصوص صحابہ کو حاصل تھا۔ صحیح مسلم میں روایت ہے کہ رسول اللہﷺ ازواجِ مطہر۔ّات ؓ کے سوا بجز حضرت اُمّ ۔ُسلیمؓ (حضرت انسؓ کی ماں) کے کسی عورت کے پاس تشریف نہیں لے جاتے تھے، چنانچہ آپ سے اس کی وجہ پوچھی گئی تو آپ نے فرمایا: مجھے ان پر رحم آتا ہے کیونکہ ان کے بھائی میرے ساتھ شہید ہوئے تھے۔1
جس لطف و محبت کے ساتھ آپ ان کے گھر تشریف لے جاتے تھے، اسی لطف و محبت کے ساتھ وہ آپ کی خدمت گزاری بھی کرتی تھیں۔ بخاری کتاب الاستیذان میں ہے کہ جب آپ ان کے گھر تشریف لے جاتے تھے تو وہ آپ کے لیے بچھونا بچھا دیتیں، آپ آرام فرماتے، جب سو کر اٹھتے تھے تو وہ آپ کا پسینہ ایک شیشی میں جمع کرلیتیں، مرتے وقت وصیت کی کہ کفن میں حنوط کے ساتھ عرق مبارک بھی شامل کرلیا جائے۔ حضرت انس بن مالکؓ کی خالہ اُمّ حرامؓ کو بھی اکثر یہ شرف حاصل ہوتا تھا، چنانچہ معمول تھا کہ جب آپ قبا کو تشریف لے جاتے تو ان کے پاس ضرور جاتے وہ اکثر کھانا لاکر پیش کرتیں اور آپ نوش فرماتے، آپ سوجاتے تو وہ آپ کے بالوں سے جوئیں نکالتیں۔2  
مخصوص صحابیات کے علاوہ قومی حیثیت سے بھی بعض صحابیات کو بعض معاشرتی فضائل حاصل ہیں اور ان فضائل میں اس قبیلے کی