Deobandi Books

میں رکھتے ہیں، دوستوں کو بطور سوغات کے تقسیم کرتے ہیں، قرآن میں رکھتے ہیں، مسجدوں میں لٹکاتے ہیں، اور مریض کو اس سے ہوا دیتے ہیں لیکن قرنِ اوّل میں یہ حالت نہ تھی، متولیٔ کعبہ صرف یہ کرتا تھا کہ غلاف کو زمین میں دفن کردیتا تھا کہ وہ ناپاک انسانوں کے کام کا نہ رہے۔ شیبہ بن عثمان نے جو اس زمانہ میں کعبہ کے کلید بردار تھے، حضرت عائشہؓ سے اس واقعہ کو بیان کیا تو انہوں نے سمجھ لیا کہ یہ تعظیم غیر شرعی ہے، خدا اور رسول اللہﷺ نے اس کا حکم نہیں دیا اور ممکن ہے کہ آئندہ اس سے سوئے اعتقاد اور بدعات کا سرچشمہ پھوٹے، اس لیے شیبہ سے کہا کہ یہ اچھی بات نہیں، تم ۔ُبرا کرتے ہو۔ جب غلاف کعبہ سے اُتر گیا اور کسی نے اس کو ناپاکی کی حالت میں استعمال بھی کرلیا تو کوئی مضائقہ نہیں، تم کو چاہیے کہ اس کو بیچ ڈالا کرو اور اس کی قیمت غریبوں اور مسافروں کو دے دیا کرو۔3 
احتساب: جو چیز مذہب اور اخلاق کو صحیح اُصول پر قائم رکھتی ہے شریعت کی اصطلاح میں اس کا نام ’’احتساب‘‘ ہے اور خود رسول اللہﷺ نے اس کے تین درجے مقر۔ّر فرمادیے ہیں:
مَنْ رَاَی مِنْکُمْ مُنْکَرًا فَلْیُغَیِّرْہُ بِیَدِہٖ فَانْ لَمْ یَسْتَطِعْ فَبِلِسَانِہٖ فِاِنْ لَمْ یَسْتَطِعْ فَبِقَلْبِہٖ وَذٰلِکَ اَضْعَفُ الْاِیْمَانْ۔1 
’’تم میں سے جو شخص کسی ۔ُبرائی کو دیکھے اس کو اپنے ہاتھ سے مٹادے، اگر اس میں اس کی طاقت نہیں ہے تو زبان سے اس کا انکار کرے اور اگر یہ بھی نہیں کرسکتا تو دل سے اس کو ۔ُبرا سمجھے اور یہ ایمان کا ضعیف ترین درجہ ہے۔‘‘
اور بااثر صحابیات نے پہلے دونوں طریقوں سے اس مذہبی خدمت کو انجام دیا ہے۔ ایک دفعہ حضرت عائشہؓ ایک گھر میں مہمان اُتریں، میزبان کی دو لڑکیوں کو جو جوان ہوچکی تھیں دیکھا کہ بے چادر نماز پڑھ رہی ہیں، تاکید کی کہ آئندہ کوئی لڑکی بے چادر اوڑھے ہوئے نماز نہ پڑھے رسول اللہﷺ نے یہی فرمایا ہے۔2 
ایک دفعہ ان کے بھائی عبدالرحمن بن ابی بکرؓ آئے اور معمولی جھٹ پٹ وضو کرکے چلے گئے، حضرت عائشہؓ نے ٹوکا کہ عبدالرحمن! وضو اچھی طرح کیا کرو، رسول اللہﷺ کو میں نے یہ کہتے ہوئے سنا ہے کہ وضو میں جو عضو نہ بھیگے اس پر جہنم کی پھٹکار ہو۔3 
ایک بار انہوں نے ایک عورت کو دیکھا کہ اس کی چادر میں صلیب کے نقش و نگار بنے ہوئے ہیں، دیکھنے کے ساتھ ڈانٹا کہ یہ چادر اُتار دو، رسول اللہﷺ ایسے کپڑوں کو دیکھتے تھے تو پھاڑ ڈالتے تھے۔4 
ایک بار ان کی بھتیجی حفصہ بنت عبدالرحمن نہایت باریک دوپٹہ اُوڑھ کر سامنے آئیں، دیکھنے کے ساتھ ہی غصہ سے دوپٹہ کو چاک کردیا۔ پھر فرمایا: ’’تم نہیں جانتیں کہ سورۂ نور میں خدا نے کیا احکام نازل فرمائے ہیں؟ اس کے بعد گاڑھے کا دوسرا دوپٹہ منگوا کر اُوڑھایا5۔‘‘ 
اخلاقی خدمات