Deobandi Books

حضرت سمیہ۔ّ ؓ نے اسلام قبول کیا تو ان کو کفا۔ّر نے طرح طرح کی اذیتیں دینا شروع کیں، سب سے سخت اذ۔ّیت یہ تھی کہ ان کو مکہ کی تپتی ریت میں لوہے کی زرہ پہنا کر دھوپ میں کھڑا کردیتے تھے، لیکن باایں ہمہ وہ اسلام پر ثابت قدم رہتی تھیں۔ ایک دن کفا۔ّر نے حسبِ معمول ان کو لوہے کی زِرہ پہنا کر کے دھوپ میں زمین پر لٹادیا تھا۔ اسی حالت میں رسول اللہﷺ کا گزر ہوا تو فرمایا: ’’صبر کرو، تمہارا ٹھکانا جنت میں ہے۔‘‘ لیکن کفا۔ّر کی اس پر بھی تسکین نہیں ہوئی اور ابوجہل نے ان کی ران میں برچھی مار کر ان کو شہید کردیا۔ چنانچہ اسلام میں سب سے پہلے شرفِ شہادت ان ہی کو نصیب ہوا۔1 اور صحابیات کی یہ سب سے بڑی فضیلت ہے کہ سب سے پہلے ایک صحابیہ نے اسلام قبول کیا اور سب سے پہلے ایک صحابیہؓ نے شرفِ شہادت حاصل کیا۔
حضرت عمرؓ کی بہن جب اسلام لائیں اور حضرت عمرؓ کو اسکا حال معلوم ہوا تو اس قدر مارا کہ بدن لہولہان ہوگیا، لیکن انہوں نے صاف صاف کہہ دیا کہ جو کچھ کرنا ہو کرو میں تو اسلام لاچکی ہوں۔2  لبینہؓ کو بھی حضرت عمرؓ مارتے مارتے تھک جاتے تو کہتے کہ ’’میں نے رحم کی بنا پر نہیں بلکہ تم کو اس وجہ سے چھوڑ دیا کہ تھک گیا ہوں۔‘‘اسی طرح وہ زنیرہ ؓ بھی جو ان کے گھرانے کی کنیز تھیں نہایت اذ۔ّیت دیتے تھے۔


قطع علائق: صحابہ کرام ؓ ایمان لائے تو ان کے تمام رشتے ناتے منقطع ہوگئے لیکن اس سے ان کی قوّت ایمانی میں کوئی تزلزل واقع نہیں ہوا۔ صحابیات کی حالت اس معاملہ میں صحابہ کرام ؓ سے بھی زیادہ نازک تھی، انسان اگرچہ اپنے تمام اعزّہ واقارب کی اعانت کا محتاج ہوجاتا ہے لیکن عورت کی زندگی کا تمام تر دارومدار شوہر کی اعانت و امداد پر ہوتا ہے اور وہ کسی حالت میں بھی اس سے بے نیاز نہیں ہوسکتی۔ باپ بیٹے سے، بیٹا باپ سے قطع تعلق کرکے زندگی بسر کرسکتا ہے لیکن عورت شوہر سے جدا ہو کر بالکل بے کس و بے چارہ ہوجاتی ہے۔ لیکن باایں ہمہ صحابیات ؓ نے اسلام کے لیے اس نازک رشتے کو بھی منقطع کیا اور اپنے کافر شوہروں سے ہمیشہ کے لیے علیحدہ ہوگئیں، چنانچہ صلح حدیبیہ کے بعد جب یہ آیت نازل ہوئی:
وَلَا تُمْسِکُوْا بِعِصَمِ الْکَوَافِرِ۔1 
’’کافرہ عورتوں سے تعلق نہ رکھو۔‘‘
تو جس طرح صحابہ کرام نے اپنی کافرہ عورتوں کو طلاق دیدی اسی طرح بہت سی صحابیات ؓ بھی اپنے کافر شوہروں کو چھوڑ کر ہجرت کر آئیں اور ان میں سے ایک بھی اپنے شوہر کے پاس واپس نہ گئی، چنانچہ حضرت عائشہؓ فرماتی ہیں:
مَانَعْلَمُ اَحَدًا مِنَ الْمُھَاجِرَاتِ اِرْتَدَّتْ بَعْدَ اِیْمَانِھَا۔2 
’’ہم کو کسی ایسی مہاجرہ عورت کا حال معلوم نہیں جو ایمان لاکر پھر مرتد ہوئی ہو۔‘‘