Deobandi Books

حضرت صفیہؓ


نام و نسب: اصلی نام زینبؓ تھا، لیکن چونکہ وہ جنگ خیبرمیں خاص آنحضرتﷺ کے حصہ میں آئی تھیں اور عرب میں غنیمت کے ایسے حصہ کو جو امام یا بادشاہ کے لیے مخصوص ہوتا تھا ’’صفیہ‘‘ کہتے تھے، اس لیے وہ بھی صفیہ کے نام سے مشہور ہوگئیں۔ یہ زرقانی کی روایت ہے۔
حضرت صفیہؓ کو ماں اور باپ دونوں کی طرف سے سیادت حاصل ہے، باپ کا نام ۔ُحیی بن اخطب تھا جو قبیلہ بنو نضیر کا سردار تھا اور حضرت ہارونؓ کی نسل میں شمار ہوتا تھا۔ ماں جس کا نام ضرد تھا1، سموأل رئیسِ قریظہ کی بیٹی تھی اور یہ دونوں خاندان (قریظہ اور نضیر) بنواسرائیل کے ان تمام قبائل سے ممتاز سمجھے جاتے تھے جنہوں نے زمانۂ دراز سے عرب کے شمالی حصوں میں سکونت اختیار کرلی تھی۔ 


نکاح: حضرت صفیہؓ کی شادی پہلے سلام بن مشکم القرظی سے ہوئی تھی، سلام نے طلاق دی تو کنانہ بن ابی الحقیق کے نکاح میں آئیں جو ابو رافع تاجرِ حجاز اور رئیس خیبر کا بھتیجا تھا۔ کنانہ جنگ خیبر میں مقتول ہوا۔ حضرت صفیہؓ کے بھائی اور باپ بھی کام آئے اور خود بھی گرفتار ہوئیں۔ 
جب خیبر کے تمام قیدی جمع کیے گئے تو دحیہ کلبیؓ نے آنحضرتﷺ سے ایک لونڈی کی درخواست کی، آنحضرتﷺ نے انتخاب کرنے کی اجازت دی انہوں نے حضرت صفیہؓ کو منتخب کیا لیکن ایک صحابی نے آپ کی خدمت میں آکر عرض کی کہ آپ نے رئیسۂ  نضیر و قریظہ، دحیہ کو دے دی؟ وہ تو صرف آپ کے لیے سزا وار ہے۔ مقصود یہ تھا کہ رئیسہ عرب کے ساتھ عام عورتوں کا سا برتاؤ مناسب نہیں۔ چنانچہ حضرت دحیہؓ کو آپ نے دوسری لونڈی عنایت فرمائی اور صفیہؓ کو آزاد کرکے نکاح کرلیا۔2 خیبر سے روانہ ہوئے تو مقام صہباء میں رسم عروسی ادا کی1 اور جو کچھ سامان لوگوں کے پاس تھا اس کو جمع کرکے دعوت ولیمہ فرمائی۔ وہاں سے روانہ ہوئے تو آپ نے ان کو خود اپنے اونٹ پر سوار کرلیا اور اپنی عبا سے ان پر پردہ کیا، یہ گویا اس بات کا اعلان تھا کہ وہ ازواجِ مطہر۔ّات ؓ میں داخل ہوگئیں۔2