Deobandi Books

زمانۂ جاہلیت میں عرب کی عورتیں نہایت بے پروائی کے ساتھ دوپٹہ اوڑھتی تھیں، اس لیے سینہ اور سر و غیرہ کھلا رہتا تھا، اس پر یہ آیت نازل ہوئی:
وَلْیَضْرِبْنَ بِخُمُرِھِنَّ عَلٰی جُیُوْبِھِنَّ۔2 
’’عورتوں کو چاہیے کہ اپنے دوپٹوں کو اپنے سینوں پر ڈال لیں۔‘‘
اس کا اثر یہ ہوا کہ عورتوں نے اپنے تہہ بند اور متفرق کپڑوں کو پھاڑ کر دوپٹے بنائے اور اپنے آپ کو سیاہ چادروں سے اس طرح ڈھانپ لیا کہ حضرت امّ سلمہؓ کے قول کے مطابق یہ معلوم ہوتا تھا کہ ان کے سرکوّوں کے آشیانے بن گئے ہیں۔3


منہیاتِ شرعیہ سے اجتناب
مزامیر سے اجتناب: راگ باجا تو بڑی چیز ہے، حضرت عائشہؓ کا یہ حال تھا کہ اونٹ کی گھنٹی کی آواز سننا بھی پسند نہیں کرتی تھیں، اگر سامنے سے گھنٹی کی آواز آتی تو ساربان سے کہتیں کہ ٹھہر جاؤ تاکہ یہ آواز سننے میں نہ آئے اور اگر سن لیتیں تو کہتیں کہ تیزی کے ساتھ لے چلو کہ میں اس آواز کو نہ سن سکوں۔4
ایک بار ایک لڑکی ان کے گھر میں گھنگھرو پہنے ہوئے داخل ہوئی، گھنگھرو کی آواز سننے کے ساتھ ہی بولیں کہ گھنگھرو پہنے ہوئے وہ میرے پاس نہ آنے پائے۔ رسول اللہﷺ نے فرمایا ہے کہ جس گھر میں اس قسم کی آوازیں آتی ہیں اس میں فرشتے نہیں آتے۔5 
مشتبہات سے اجتناب: حدیث شریف میں آیا ہے کہ جو چیز مشتبہ ہے اس کو چھوڑ کر وہ چیز اختیار کرو جو غیر مشتبہ ہے، حلال بھی واضح ہے اور حرام بھی لیکن ان کے درمیان مشتبہ چیزیں ہیں۔ پس جو شخص مشتبہ گناہوں کو چھوڑ دے گا وہ کھلے ہوئے گناہوں کا سب سے زیادہ چھوڑنے والا ہوگا اور جو شخص مشتبہ گناہوں کا مرتکب ہوگا بہت ممکن ہے کہ کھلے ہوئے گناہوں کا مرتکب ہوجائے۔ گناہ خدا کی چراگاہ ہے اور جو شخص چراگاہ کے آس پاس چرائے گا ممکن ہے کہ اس کے مویشی اس میں پڑجائیں۔ صحابیاتؓ اس حدیث پر نہایت شد۔ّت سے عامل تھیں۔ ایک صحابیہ نے اپنی لونڈی کو اپنی ماں پر صدقہ کردیا تھا، وہ مرگئیں تو اس لونڈی کی حالت مشتبہ ہوگئی، صدقہ کرچکی تھیں اور صدقہ کا مال واپس لینا جائز نہیں، ماں اس کی مالک ہوگئی تھی اور اس کے مرنے کے بعد یہ اس کی وارث ہوگئی تھیں اس لیے وہ ان کو وارثت میں مل سکتی تھی۔ اس اشتباہ کے رفع کرنے کے لیے وہ رسول اللہﷺ کی خدمت میں حاضر ہوئیں اور واقعہ بیان کیا۔ آپ نے فرمایا: ’’تمہیں صدقہ کا ثواب مل چکا اور اب وہ تمہاری وراثت میں آگئی1۔‘‘