Deobandi Books

باہمی اعانت: صحابیاتؓ مصیبت میں دوسروں کی اعانت فرماتی تھیں اور ہمسایہ صحابیات اپنی پڑوسنوں کو ہر قسم کی مدد دیتی تھیں۔ حضرت اسماءؓ کو روٹی پکانا نہیں آتی تھی لیکن ان کی پڑوسنیں ان کی روٹی پکایا کرتی تھیں۔2 
اگر عورتوں کو اپنے شوہروں سے شکایت پیدا ہوتی تو وہ حضرت عائشہؓ کی خدمت میں حاضر ہو کر اپنا درد و دکھ کہتی تھیں۔ وہ رسول اللہﷺ کی خدمت میں نہایت پر زور طریقے سے ان کی سفارش کرتی تھیں۔ ایک بار ان کی خدمت میں ایک عورت سبز دوپٹہ اوڑھ کر آئی اور جسم کھول کر دکھایا کہ شوہر نے اس قدر مارا ہے کہ بدن پر نیل پڑگئے ہیں۔ رسول اللہﷺ تشریف لائے تو حضرت عائشہؓ نے کہا کہ مسلمان عورتیں جو مصیبت برداشت کررہی ہیں ہم نے ایسی مصیبت نہیں دیکھی۔ دیکھئے! اس کا چمڑا اس کے دوپٹہ سے زیادہ سبز ہوگیا ہے۔ بخاری کی اس روایت کے آخر میں عموماً عورتوں کی نسبت یہ الفاظ ہیں:
وَالنِّسَائُ یَنْصُرُ بَعْضُھُنَّ بَعضًا۔3 
’’عورتوں کی یہ فطرت ہے کہ ایک دوسری کی اعانت کرتی ہیں۔‘‘
ایک شخص کی بیوی بیمار تھیں وہ حضرت اُمّ الد۔ّرداءؓ کے پاس آئے، انہوں نے حال پوچھا تو انہوں نے کہا: بیوی بیمار ہے، اب انہوں نے ان کو بٹھا کر کھانا کھلایا اور جب تک ان کی بیوی بیمار رہیں، حال پوچھتیں اور کھانا کھلاتی رہیں۔4


عیادت: صحابیاتؓہر ممکن طریقہ سے مریضوں کی عیادت کرتی تھیں۔ ایک بار اہل صفہ میں سے ایک صحابی بیمار تھے، حضرت اُمّ الد۔ّرداءؓ اونٹ پر سوار ہو کر آئیں اور ان کی عیادت کی۔5 


تیمار داری: صحابیاتؓ نہایت دل سوزی سے مریضوں کی تیمار داری کرتی تھیں۔ حضرت عثمان بن مظعون بیمار ہوئے تو حضرت اُمّ العلاءؓ اور ان کے تمام خاندان نے ان کی تیمار داری کی، ان کا انتقال ہوگیا تو کفن پہنانے کے بعد حضرت اُمّ العلاءؓ نے محبت کے لہجے میں کہا: ’’تم پر خدا کی رحمت ہو، میں شہادت دیتی ہوں کہ خدا نے تمہاری عزّت کی1۔‘‘ 
حضرت زینب ؓ مرض الموت میں بیمار ہوئیں تو حضرت عمرؓ نے ازواجِ مطہر۔ّات سے پوچھوایا کہ کون ان کی تیمار داری کرے گا؟ تمام بیبیوں نے کہا: ’’ہم۔‘‘ ان کا انتقال ہوا تو پھر دریافت کیا کہ کون ان کو غسل و کفن دے گا؟ تمام بیبیوں نے کہا: ’’ہم۔‘‘  2