Deobandi Books

حضرت عائشہؓ کے بھائی محمد بن ابی بکرؓ کے بچے یتیم ہوگئے تو حضرت عائشہؓ ان کی پرورش فرماتی تھیں۔3 


یتیموں کے مال کی نگہداشت: خداوند تعالیٰ نے قرآن مجید میں یتیموں کے مال کی حفاظت و نگہداشت کے متعلق ایک نہایت مفصل آیت نازل فرمائی ہے:
وَابْـتَـلُوا الْـیَـتَامٰی حَتّٰی اِذَا بَلَغُوا النِّکَاحَ ۔۔۔۔۔اٰلایۃ
اس بنا پر صحابیات نہ صرف انکے مال کی حفاظت کرتی تھیں بلکہ اس کو ترقی دیتی تھیں۔ حضرت عائشہؓ یتیموں کے مال لوگوںکو دیتی تھیں کہ تجارت کے ذریعہ سے ان کو ترقی دیں۔4 
بچوں کی پرورش: صحابیاتؓ بچوں کی پرورش میں اپنے عیش و آرام کو بھی فراموش کردیتی تھیں۔ حضرت اُمّ ۔ُسلیمؓ بیوہ ہوئیں تو حضرت انس بن مالکؓ بچے تھے، اس لیے انہوں نے یہ عزم بالجزم کرلیا کہ جب تک ان کی نشوونما کامل طور پر نہ ہوجائے گی، وہ دوسرا نکاح نہ کریں گی۔ چنانچہ حضرت انس ؓ خود سپاس گزارانہ لہجے میں اعتراف کرتے ہیں کہ اللہ تعالیٰ میری ماں کو جزائے خیر دے کہ اس نے میری ولایت کا حق ادا کیا۔1 
رسول اللہﷺ صحابیات کو دنیا کی تمام چیزوں سے زیادہ محبوب تھے لیکن بایں ہمہ جب آپ نے حضرت اُمّ ہانیؓ سے نکاح کا پیام دیا تو انہوں نے معذرت کی کہ یارسول اللہ! آپ مجھے میری آنکھوں سے بھی زیادہ عزیز ہیں لیکن شوہر کا حق بہت زیادہ ہے، اس لیے مجھے خوف ہے کہ اگر میں شوہر کا حق ادا کروں تو بچوں کی طرف سے بے پروائی کرنا پڑے گی اور اگر بچوں کی پرورش میں مصروف رہوں گی تو شوہر (یعنی آپ سے اگر نکاح کرلوں گی) کا حق ادا نہ کرسکوں گی۔2 


شوہر کے مال و اسباب کی حفاظت: زن و شوہر کے معاشرتی تعلقات پر اسکا نہایت عمدہ اثر پڑتا ہے کہ بیوی نہایت دیانت کے ساتھ شوہر کے مال و اسباب اور گھر بار کی حفاظت کرے اور صحابیات میں عموماً یہ دیانت پائی جاتی تھی۔ حضرت اسماء بنت ابی بکرؓ کی شادی حضرت زبیرؓ سے ہوئی تھی، وہ گھر میں تھیں کہ ایک غریب سوداگر آیا اور کہا کہ اپنے سایۂ دیوار کے نیچے مجھ کو سودا بیچنے کی اجازت دیجیے، وہ عجیب کشمکش میں مبتلا ہوئیں۔ فیاضی اور کشادہ دلی سے اجازت دینا چاہتی تھیں لیکن شوہر کی اجازت کے بغیر اجازت نہیں دے سکتی تھیں، بولیں: ’’اگر میں اجازت دے دوں اور زبیر انکار کردیں تو مشکل پڑے گی۔ زبیرؓ کی موجودگی میں آؤ اور مجھ