Deobandi Books

حلیہ: اصابہ میں ہے:
کَانَتْ اُمُّ سَلَمَۃَ مَوْصُوْفَۃً بِالْجَمَالِ الْبَارِعِ۔2 
’’یعنی حضرت اُمّ سلمہ نہایت حسین تھیں۔‘‘
ابن سعد ؒ  نے روایت کی ہے کہ جب حضرت عائشہؓ کو ان کے حسن کا حال معلوم ہوا تو سخت پریشان ہوئیں3، مگر واقدی کی روایت ہے جو چنداں قابل اعتبار نہیں۔ حضرت اُمّ سلمہؓ کے بال نہایت گھنے تھے۔4 


فضل و کمال: علمی حیثیت سے اگرچہ تمام ازواج بلند رتبہ تھیں تاہم حضرت عائشہؓ اور حضرت اُمّ سلمہؓ کا ان میں کوئی جواب نہ تھا۔ چنانچہ محمود بن لبید کہتے ہیں۔
کَانَ أَزْوَاجُ النَّبِیِّﷺ یَحْفَظْنَ مِنْ حَدِیْثِ النَّبِیِّﷺ کَثِیْراً وَلَا مِثْلًا لِعَائِشَۃَ وَاُمِّ سَلَمَۃَ ؓ۔5 
’’آنحضرت کی ازواج احادیث کا مخزن تھیں، تاہم عائشہ اور اُمّ سلمہؓ کا ان میں کوئی حریف مقابل نہ تھا۔‘‘
مروان بن حکم ان سے مسائل دریافت کرتا اور اعلانیہ کہتا تھا:
کَیْفَ نَسْألُ اَحَدًا وَفِیْنَا أَزْوَاجُ النَّبِیِّ ﷺ۔ 6 
’’آنحضرتﷺ کی ازواج کے ہوتے ہوئے ہم دوسروں سے کیوں پوچھیں۔‘‘
حضرت ابو ہریرہ اور ابن عباسؓ دریائے علم ہونے کے باوجود ان کے دریائے فیض سے مستغنی نہ تھے۔  تابعین کرام کا ایک بڑا گروہ ان کے آستانہ فضل پر حاضر رہتا تھا۔
قرآن اچھا پڑھتیں اورآنحضرتﷺ کے طرز پر پڑھ سکتی تھیں۔ ایک مرتبہ کسی نے پوچھا آنحضرتﷺ کیوں کر قرأت کرتے تھے؟ بولیں: ایک ایک آیت الگ الگ کرکے پڑھتے تھے، اس کے بعد خود پڑھ کر بتلایا۔1
حدیث میں حضرت عائشہؓ کے سوا ان کا کوئی حریف نہ تھا ان سے ۳۷۸ روایتیں مروی ہیں، اس بنا پر وہ محدثین صحابہؓ کے تیسرے طبقہ میں شامل ہیں۔
حدیث سننے کا بڑا شوق تھا، ایک دن بال گوندھوارہی تھیں کہ آنحضرتﷺ خطبہ دینے کے لیے کھڑے ہوئے، زبانِ مبارک سے اَیُّھَا النَّاسُ! (اے لوگو!)کا لفظ نکلا تو فوراً بال باندھ کر اُٹھ کھڑی ہوئیں اور کھڑے ہو کر پورا خطبہ سنا۔2 
مجتہد تھیں، صاحبِ اصابہ نے ان کے تذکرہ میں لکھا ہے: