ماہنامہ انوار مدینہ لاہور نومبر 2013 |
اكستان |
 |
'سَمَاء ''کی تشریح :
ممکن ہے کہ کسی کویہ اِشکال ہو کہ قرآنِ پاک کی آیت میں لفظ''سمائ'' آیا ہے تو اِس سے آسمان ہی مراد ہوگا آسمان کی سمت مراد نہیں ہو سکتی ۔
تو اِس کا جواب یہ ہے کہ''سمائ'' عربی زبان میں آسمان کو بھی کہتے ہیں اَور آسمان کی جہت کو بھی۔ اِس لیے ہمارے سر کے اُوپر کی سمت جو کچھ ہے وہ سب سماء (آسمان) ہے اِسی لیے قرآنِ پاک میں کہیں تو اِرشاد ہے :
( وَاَنْزَلْنَا مِنَ السَّمَآئِ مَآئً طَھُوْرًا ) (پ ١٩ رکوع ٣)
''یعنی ہم نے آسمان کی طرف سے پاکی حاصل کرنے کا پانی اُتارا۔''
( وَاَرْسَلْنَا الرِّیَاحَ لَوَاقِحَ ) (پ ١٤ رکوع ٢)
''اَور ہم نے رَس بھری ہوائیں چلائیں۔ ''
( وَھُوَالَّذِیْ یُرْسِلُ الرِّیَاحَ بُشْرًا بَیْنَ یَدَیْ رَحْمَتِہ ) (پ ٨ رکوع ١٤)
''اَور وہی ہے جو خوشخبری لانے والی ہوائیں بارش سے پہلے چلاتا ہے۔''
گویا کہیں تو یہ بتلایا گیا ہے کہ آسمان سے پانی اُتارا اَور کہیں یہ بتلایا گیا ہے کہ ہم ہواؤں کے ذریعہ پانی بھیجتے ہیں۔
اَور آسمان سے آسمان کی سمت کی چیزیں مثلاً بارش مراد لینی عربی محاورہ ہے چنانچہ ایک شاعر نے کہا ہے کہ :
اِذَا نَزَلَ السَّمَائُ بِاَرْضِ قَوْمٍ رَعَیْنَاہُ وَاِنْ کَانُوْا غِضَابٰا
جب آسمان (بارش) کسی قوم کی سرزمین پر برستی ہے تو ہم (اُس قوم کی چراگاہ میں بزور بھی اَپنے جانوروں کو) چَرالیتے ہیں چاہے اُس قوم والے ناراض اَور غصہ ہی کیوں نہ ہوں (کیونکہ ہم بہت بہادر اَور غالب ہیں کوئی ہمارا کچھ نہیں بگاڑا سکتا)۔
اِس شعر میں ''آسمان کے اُترنے ''کا لفظ اِستعمال کیا گیا ہے اَور مراد ''بارش'' ہے جو آسمان کی طرف سے آتی ہے۔