ماہنامہ انوار مدینہ لاہور جولائی 2013 |
اكستان |
 |
علمی مضامین سلسلہ نمبر٦٤ ''اَلحامد ٹرسٹ''نزد جامعہ مدنیہ جدید رائیونڈ روڈ لاہورکی جانب سے شیخ المشائخ محدثِ کبیر حضرت اَقدس مولانا سیّد حامد میاں صاحب رحمة اللہ علیہ کے بعض اہم خطوط اور مضامین کو سلسلہ وار شائع کرنے کا اہتمام کیا گیا ہے جو تاحال طبع نہیں ہوسکے جبکہ ان کی نوع بنوع خصوصیات اس بات کی متقاضی ہیں کہ افادۂ عام کی خاطر اِن کو شائع کردیا جائے۔ اسی سلسلہ میں بعض وہ مضامین بھی شائع کیے جائیں گے جو بعض جرا ئد و اخبارات میں مختلف مواقع پر شائع ہو چکے ہیں تاکہ ایک ہی لڑی میں تمام مضامین مرتب و یکجا محفوظ ہو جائیں۔ (اِدارہ) چند عملیات اَ ور وظائف جو ہر آدمی کو کرتے رہنا چاہیے بِسْمِ اللّٰہِ الرَّحْمٰنِ الرَّحِیْمِ اَلْحَمْدُ لِلّٰہِ رَبِّ الْعَالَمِیْنَ وَالصَّلٰوةُ وَالسَّلَامُ عَلٰی خَیْرِ خَلْقِہ سَیِّدِنَا وَمَوْلَانَا مُحَمَّدٍ وَّاٰلِہ وَاَصْحَابِہ اَجْمَعِیْنَ اَمَّابَعْدُ ! یہ زمانہ پُر آشوب اَور پُرفتن ہے۔ اِسی لحاظ سے مجھے خیال آیا کہ چند ایک باتیں جو اِس دَور کے لحاظ سے خاص طور پر ضروری ہیں عرض کروں اَور اِس اِعتبار سے کہ یہ مجلس قرآنِ پاک کی دَرس گاہ کی ہے مناسب معلوم ہوتا ہے کہ قرآنِ پاک ہی کے متعلق یہ اُمور ذکر کیے جائیں لہٰذا چند ایک آیتوں اَور سورتوں کی فضیلت تحریر کر رہا ہوں : (١) یہ زمانہ عقائد و اَعمال میں بے راہ روی کا ہے اِس زمانہ میں اِنسان فتنوں سے بچا رہے اُس کے عقائد صحیح رہیں یہ ایک مسلمان کے لیے سب سے بڑی دولت ہے اِس کے لیے روزانہ صبح کو سورۂ کہف کی اِبتدائی دس آیتیں پڑھتے رہنی چاہئیں۔ حدیث شریف میں آتا ہے کہ ایسا شخص دَجال کے فتنہ اَور شر سے محفوظ رہے گا، اِس سے یہ بات واضح طرح سمجھ میں آرہی ہے کہ وہ آج کے دَور کے چھوٹے چھوٹے دَجالوں کے شر سے تو اِنشاء اللہ ضرور ہی بچا رہے گا۔ دسویں آیت کے ترجمہ سے معلوم ہوتا ہے کہ خدا کی رحمت اُس کے شامل ِ حال رہے گی۔