ماہنامہ انوار مدینہ لاہور مارچ 2012 |
اكستان |
 |
(٢) آپ کے مسلمان ہو جانے سے خود بخود لوگوں کو اِسلام ١ کی طرف توجہ پیداہوئی اَور پھر آپ نے تبلیغ کا کام شروع کردیا۔ قبل ِہجرت کا پُر خطر و قت جبکہ خود اپنے اِسلام کا اِظہار مشکل تھا کلمہ اِسلام کا زبان پر لانا اَژدھے کے منہ میں ہاتھ ڈالنا تھا، ایسے نازک وقت میں دُوسروں کو مسلمان بنانے کی کوشش کرنا اِن ہی کا کام تھا۔ ایک جماعت اَشراف ِقریش کی حضرت صدیق ہی کی وعظ و تبلیغ سے مشرف بہ اِسلام ہوئی، عشرہ مبشرہ میں حضرت عثمان، حضرت طلحہ، حضرت زُبیر، حضرت سعد بن اَبی وقاص فاتح اِیران، حضرت عبدالرحمن بن عوف رضی اللہ عنہم اِن ہی کی ہدایت سے مسلمان ہوئے، یوں تو اَور بہت سے اَکابر کو اِن سے ہدایت ہوئی مگر یہ پانچ وہ ہیں جن کے مسلمان ہو نے سے کفر کی تیز چھری ذرا کند ہوگئی کیونکہ یہ حضرات مکہ کے چار ذی اَثر قبائل میں سے تھے اَور ہر ایک اپنے قبیلہ میں با وَجاہت تھا، حضرت عثمان رضی اللہ عنہ بنو اُمیہ میں ،حضرت زبیر رضی اللہ عنہ بنو اَسد میں، حضرت سعد رضی اللہ عنہ اَور حضرت عبدالرحمن بنو زہرہ میں۔ ١ آج بھی اَغیار کے لیے حضرت اَبو بکر رضی اللہ عنہ کا اِسلام رسولِ خدا ۖ کی صداقت کا بہترین برہان ہے چنانچہ ولیم میور سابق گور نر صوبہ متحدہ کی کتاب لائف آف محمد ۖ کے دیپاچہ سے چند فقرات نقل کیے جاتے ہیں، یہ متعصب یورپ کا عیسائی لکھتا ہے : ''آپ کا عہدِ خلافت مختصر تھا مگر رسول اللہ کے بعد اَور کوئی ایسا نہیں ہوا جس کا اِسلام کو اِن سے زیادہ ممنون اَور مرہونِ اِحسان ہونا چاہیے چونکہ اَبو بکر رضی اللہ عنہ کے دِل میں رسول (اَکرم) کااِعتقاد نہایت راسخ طور پر متمکن تھا اَور یہی عقیدہ خود رسول (اَکرم ) کے خلوص اَور سچائی کی ایک زبر دست شہادت ہے لہٰذا میں نے آپ کی حیات و صفات کے تذکرہ کے لیے کچھ جگہ زیادہ وقف کی ہے اگر حضرت محمد ( ۖ) کو اِبتداء سے اپنے کذاب ہونے کا یقین ہوتا تو وہ کبھی ایسے شخص کو دوست اَور عقیدت مند نہ بناسکتے جو نہ صرف دانا اَور ہوشمند تھا بلکہ سادہ مزاج اَور صفائی پسند بھی تھا۔ اَبو بکر کو نفسانی عظمت و شوکت کا بھی خیال نہیں آیا، اُنہیں شاہانہ اِقتدار حاصل تھا اَور وہ بالکل خود مختار تھے مگر وہ اِس طاقت و اِقتدار کو اِسلام کی بہتری اَور کافہ اَنام کے فائدہ پہنچانے میں عمل میں لایا کیے، اُن کی ہوشمندی اِس اَمر کی مقتضی نہ تھی کہ خود فریب کھالیں، وہ خود ایسے متدین تھے کہ کسی کو دھوکہ نہ دے سکتے تھے۔'' (منقول اَز آیاتِ بینات حصہ فدک)