ماہنامہ انوار مدینہ لاہور اپریل 2010 |
اكستان |
|
آپ علامہ افغانی مرحوم کے شاگرد اَور حضرت لاہوری کے متوسل تھے۔ آپ نے یہ کتاب صحابہ کرام رضی اللہ عنہم سے عقیدت و محبت پیدا کرنے اَور اُن کے نقشِ پا پر چلنے کے حوالے سے تحریر فرمائی تھی۔ پہلے بھی یہ کتاب اِدارہ تالیفات ِ اشرفیہ ملتان سے چھپی تھی اَب دوبارہ وہیں سے جدید اَنداز میں مزید دو رسائل کے اضافہ کے ساتھ چھپی ہے، ایک رسالہ تو ''صحابۂ کرام اَور اُن پر تنقید '' کے عنوان سے ہے جو خود مصنف ہی کا ہے دُوسرا رسالہ ''تنقید اَور حق ِ تنقید'' ہے جو شہید ِ اِسلام حضرت مولانا محمد یو سف لُدھیانوی کا تحریر کردہ ہے۔کتاب کا ڈسٹ کور نہایت نفیس اَور کتابت و طباعت نیز کاغذ بہت عمدہ ہیں۔ صحابۂ کرام سے محبت و مودّت رکھنے والوں کو اِس کا ضرور مطالعہ کرنا چاہیے۔ نام کتاب : یاد گار ملاقاتیں مرتب : مولانا محمد اسحق صاحب صفحات : ٤٨٠ سائز : ١٦/٢٣٣٦ ناشر : ادارہ تالیفات اشرفیہ ملتان قیمت : درج نہیں مولانا محمد اسحق صاحب زید مجدہم مدیر اِدارہ تالیفات ِاشرفیہ نے اپنے اِدارہ میں اشاعت کا ایک یادگار سلسلہ قائم فرمایا ہے جس کی چار کڑیاں ہیں: (١) یاد گاریں باتیں (٢) یادگار ملاقاتیں (٣) یاد گار تحریریں (٤)یاد گار واقعات۔ زیرتبصرہ کتاب اِسی سلسلہ کی دُوسری کڑی ہے اِس کتاب میں تاریخ ِ اسلام سے منتخب انبیاء علیہم السلام ،صحابہ کرام، تابعین و تبع تابعین حضرات فقہاء و محدثین اَور اَکابر اَولیاء اللہ کی یادگار ملاقاتیں نیز اَرباب ِاقتدار کی صلحائے اُمت سے اَور صلحائے اُمت کی اَرباب ِاقتدار سے ملاقاتیں اِنتہائی دل نشیں اَنداز میں ذکر کی گئیں ہیں۔ کتاب دلچسپ ہونے کے ساتھ ساتھ طباعت کے عمدہ معیار کے ساتھ شائع کی گئی ہے، قارئین اِس سے ضرور استفادہ فرمائیں۔