ماہنامہ انوار مدینہ لاہور اپریل 2010 |
اكستان |
|
وفیات ١١ مارچ کو کراچی میں عالمی مجلس تحفظِ ختم نبوت کراچی کے امیر حضرت مولانا سعید احمدصاحب جلال پوری اپنے بیٹے اَور ساتھیوں سمیت شہید کردیے گئے جبکہ اُسی دِن ایک اَور حملہ میں مولانا عبدالغفور صاحب ندیم کو اُن کے بیٹے اَور ساتھیوں سمیت شہید کردیا گیا اِنَّا لِلّٰہِ وَاِنَّا اِلَیْہِ رَاجِعُوْن۔َ چند سالوں سے پاکستان میں علمائے حق کا قتل ِناحق ایک معمول بن چکا ہے اَب تک شہید کیے گئے بیشمار علماء کے قاتلوں میں سے کسی کو آج تک قرارِ واقعی سزا نہیں دی گئی جبکہ بہت سوں کے قاتلوں کی اَب تک گرفتاری بھی عمل میں نہیں آئی۔ پاکستان کے ہر شہری کی جان و مال کی حفاظت حکومت ِوقت کی ذمہ داری ہوتی ہے اَور ناکامی کی صورت میں مقتولین کی دیت حکومت کے ذمہ لازم ہوجاتی ہے، پے درپے اَندھے قتلوں اَور حکومت کی بے حسی کے نتیجہ میں عوام کا اِضطراب دِن بدن بڑھتا ہی جارہا ہے جو کسی بھی وقت خطرناک صورت اِختیار کر سکتا ہے۔ حکومت کو چاہیے کہ اِن شہدا کی شہادت کے ذمہ داروں کے خلاف فوری اَور غیرجانبدار کارروائی کر ے تاکہ آئندہ کے لیے ایسے ناپسندیدہ حادثات کا سدِّباب ہو کر ملک میں امن و امان کی فضاء قائم ہوجائے۔ اللہ تعالیٰ شہید ہونے والے علماء کو اپنے جوار ِ رحمت میں جگہ دے اَور اُن کے پسماندگان کو صبرِ جمیل عطافرمائے اہل ِ اِدارہ اُن کے غم میں برا بر کے شریک ہیں۔ ٭ جامعہ مدنیہ جدید کے اُستاذ الحدیث مولانا حفیظ الرحمن صاحب کی خوش دامن صاحبہ، جناب شیخ یوسف صاحب کے خسر صاحب گزشتہ ماہ وفات پا گئے اِنَّا لِلّٰہِ وَاِنَّا اِلَیْہِ رَاجِعُوْنَ ۔ اللہ تعالیٰ جملہ مرحومین کی مغفرت فرما کر جنت الفردوس میں اعلیٰ مقام نصیب فرمائے اَور لواحقین کو صبر جمیل کی توفیق عطا فرمائے۔ جامعہ مدنیہ جدید اَور خانقاہِ حامدیہ میں جملہ مرحومین کے لیے ایصالِ ثواب کرایا گیا ۔اللہ تعالیٰ قبول فرمائے،آمین۔