ماہنامہ انوار مدینہ لاہور نومبر 2008 |
اكستان |
|
عالمی خبریں عدالت کے حکم سے امریکی فوج کے غیر اِنسانی سلوک کی 29 تصاویر منظر ِ عام پر لائی جائینگی واشنگٹن(اے پی پی ) امریکی عدالت نے عراق اور افغانستان میں قیدیوں پر امریکی فوجیوں کے ظلم وستم کو آشکار کرنے والی 29تصاویر کو منظر ِ عام پر لانے کا حکم دے دیا ۔ ذرائع ابلاغ کی رپورٹس کے مطابق امریکہ کی ایک عدالت نے عراق اور افغانستان میں قیدیوں سے غیر اِنسانی سلوک کی 29 تصاویر کو منظر ِ عام پرلانے کا حکم دے دیا جس سے عراق و افغانستان میں امریکی فوجیوں کی جانب سے قیدیوں پر ڈھائے جانے والے مظالم سامنے آسکیں گے۔ اُن مظالم کی تصاویر پہلے کبھی منظر ِ عام پر نہیں آئیں۔ قبل اَزیں 2006 ء میں بھی اُن تصاویر کو منظر ِ عام پر لانے کا حکم دیا گیا تھا تاہم امریکی وزارت دفاع کی اپیل پر اُن کا اجراء روک دیا گیا تھا۔ ( روزنامہ نوائے وقت ٢٤ ستمبر ) خبردار : موبائل فون اِستعمال کرنے سے مردانہ بانجھ پن پیدا ہوسکتا ہے : طبی ماہرین واشنگٹن(نیٹ نیوز) اوہائیو میں کلیو لینڈکلینک کے ریسرچرز نے مردوں کو خبردار کیاہے کہ وہ اپنے موبائل فون کے ساتھ ہینڈ فری کے اِستعمال میں احتیاط سے کام لیں کیونکہ اِس سے مردانہ بانجھ پن پیدا ہونے کا خدشہ ہے۔ رپورٹ میں کہا گیا ہے کہ جو مرد اپنی پینٹ میں موبائل رکھتے ہیں یا بیلٹ میں لگا کر رکھتے ہیں اور ساتھ ہینڈ فری کے ذریعے گفتگو کرتے رہتے ہیں اُن میں مردانہ بانجھ پن کے خطرات بڑھ جاتے ہیں۔ دُوسری جانب بی بی سی کے مطابق یونیورسٹی ایلبنی اور یونیورسٹی پٹسبرگ کے کینسر کے شعبے کے سر براہوں نے امریکی ایوان نمائندگان کی قائمہ کمیٹی کو موبائل فون کے نقصانات سے آگاہ کیا اور تجویذ کیا کہ جس طرح سگریٹ نوشوں کو سگریٹ نوشی کے نقصانات سے خبردار کیا جاتا ہے اِسی طرح موبائل فون کے اِستعمال کرنے والوں کو بھی اِس کے مضر اَثرات سے خبردار کیا جانا چاہیے۔( روز نامہ نوائے وقت ٢٧ستمبر )