ماہنامہ انوار مدینہ لاہور ستمبر 2004 |
اكستان |
 |
سلسلہ نمبر٦ قسط : ٩ ''الحامد ٹرسٹ''نزد جامعہ مدنیہ جدید رائے ونڈ روڈ لاہورکی جانب سے شیخ المشائخ محدثِ کبیر حضرت اقدس مولانا سیّد حامد میاں صاحب رحمة اللہ علیہ کے بعض اہم خطوط اور مضامین کو سلسلہ وار شائع کرنے کا اہتمام کیا گیا ہے جو تاحال طبع نہیں ہوسکے جبکہ ان کی نوع بنوع خصوصیات اس بات کی متقاضی ہیں کہ افادۂ عام کی خاطر اِن کو شائع کردیا جائے۔ اسی سلسلہ میں بعض وہ مضامین بھی شائع کیے جائیں گے جو بعض جرا ئد و اخبارات میں مختلف مواقع پر شائع ہو چکے ہیں تاکہ ایک ہی لڑی میں تمام مضامین مرتب و یکجا محفوظ ہو جائیں ۔(ادارہ) مہتمم اول دارالعلوم دیوبند جناب حضرت مولانا حاجی سیّد محمد عابد صاحب قدس اللہ سرہ ورفع درجاتہ ( نظر ثانی و عنوانات : مولانا سےّد محمود میاں صاحب )٭٭٭ حضرت اقدس مولانا نانوتوی اور دیوبند : آپ کی پیدائش ١٢٤٨ھ /١٨٣٢ء میں قصبہ نانوتہ ضلع سہارنپور میں ہوئی ۔ ابتدائی تعلیم وطن مالوف میں حاصل کی ۔ یہ قصبہ دیوبند سے جانب مغرب ١٦ میل کے فاصلہ پرہے یہاں نویں صدی ہجری سے صدیقی شیوخ کا ایک ممتاز خاندان آباد ہے حضرت نانوتوی اسی خاندان کے چشم و چراغ ہیں۔ مکتبی تعلیم کے بعد آپ کو دیوبند پہنچادیا گیا یہاں کچھ دنوں مولوی مہتاب علی کے مکتب میں پڑھا پھر اپنے نانا کے پاس سہارنپور چلے گئے جو وہاں وکیل تھے۔ سہار نپور میں مولوی نواز سے عربی صرف و نحو کی ابتدائی کتابیں پڑھیں۔ ١٢٥٩ھ/ ١٨٤٣ء کے آخر میں ان کو حضرت مولانا مملوک علی نانوتوی اپنے ہمراہ دہلی لے گئے وہاں کافیہ شروع کیا اور وہیں تکمیل ِعلوم کی ۔ (تاریخ دارالعلوم ص ١٠٢ج١) حضرت نانوتوی کی سسرال دیوبند کے محلہ دیوان میں تھی ۔ یہ محلہ چھتے کی مسجد کے شرق میں واقع ہے اب اس محلے کا خاصا حصہ دارالعلوم میں شامل ہو چکا ہے دارالعلوم کا مہمان خانہ اور اساتذہ کے لیے مکانا ت اسی جگہ تعمیر ہوئے ہیں ۔