ماہنامہ انوار مدینہ لاہور اپریل 2017 |
اكستان |
 |
ہفتم : جو کچھ بھی اِس سفر میں ختم ہو جائے یا جس قسم کا بھی مالی نقصان یا تکلیف یا مصیبت اُٹھانی پڑے تو اُس پر خوش دل رہو اور اِس کو اپنے حج کے مقبول ہونے کی علامت سمجھو اور اپنے پروردگار سے ثواب کی اُمید رکھو۔ حج کی عبادت میں رموز و اسرار تو بہت ہیںمگر ہم صرف دو مضمون بیان کرتے ہیں :مشروعیت ِحج کی حکمت : اوّل : حج اُس رہبانیت کا بدل ہے جو پہلی اُمتوں میں رائج تھی، حدیث میں آیا ہے کہ اُمت ِمحمدیہ کی رہبانیت اللہ تعالیٰ نے حج کو بنادیا ہے۔ اوّل بیت ِعتیق یعنی سب سے پہلے بنے ہوئے مکان کو اللہ تعالیٰ نے شرفِ عنایت فرمایا یعنی اِس کو اپنی جانب منسوب فرمایا اور'' بیت اللہ'' نام رکھ دیا پھر اُس کے گردونواح کو حرام گردانا، میدانِ عرفات کو حرم کا صحن بنایا اور اِس کا شرف اس طرح فرمایا کہ نہ وہاں شکار جائز ہے نہ درخت کاٹنا حلال ،سویہ ظاہر ہے کہ اللہ تعالیٰ شانہ مکان سے منزہ ہے اور گھر یا مکان کا محتاج نہیں ہے وہ سب کو محیط ہے اور اُسے کوئی جگہ اپنے احاطہ میں نہیں لے سکتی پس اُس نے خانہ کعبہ کو جو اپنی جانب منسوب کیا اور اُس کے طواف کا لوگوں کو حکم دیا تو اِس میں حکمت یہ ہے کہ بندوں کی غلامی کا اظہار اور اُن کی بندگی کاامتحان ہو جائے اور فرمانبردار غلام اپنے آقا کے دربار میں دُور دراز جگہوں سے بالقصد زیارت کرنے کو جوق در جوق ایسی حالت سے آئیں کہ بال بکھرے ہوئے ہوں غبار آلودہ ہوں شاہی ہیبت جلال سے حیران و پریشان حال ہوں ننگے پائوں مسکین و محتاج بنے ہوئے ہوں اور اِسی مصلحت سے اس عبادت میں جس قدر بھی اعمال واَرکان مقرر کیے گئے ہیں وہ سب بعید اَزعقل ہیں تاکہ ایسے اعمال کاادا کرنا محض حق تعالیٰ کے حکم کی تعمیل سمجھ کر ہو اور کوئی طبعی خواہش یا عقلی حکمت کا اتباع اس کا باعث نہ ہو چنانچہ آنحضرت ۖنے فرمایا تھا کہ '' بارِ الٰہی ہم اپنی عبودیت و غلامی کا اظہار کرنے کو عبادتِ حقہ یعنی حج میں حاضر ہیں ''