اہل اللہ اور صراط مستقیم |
ہم نوٹ : |
بس دعا کیجیے اللہ تعالیٰ عمل کی توفیق دے۔ میرے شیخ کے خلیفہ صوفی غلام سرور صاحب نے لاہور سے فون کیا ہے کہ میری بیٹی ہسپتال میں داخل ہے، اللہ تعالیٰ اس کو صحت عطا فرمائے۔اے اللہ! ہم سب کو سلامتیٔ اعضا سلامتیٔ ایمان کے ساتھ حیات نصیب فرما اور سلامتیٔ اعضاء سلامتیٔ ایمان کے ساتھ دنیا سے اُٹھا۔ یہ دعا ہمارے لیے، ہمارے بچوں کے لیے، ہمارے گھروالوں کے لیے، ہمارے دوستوں کے لیے اور سارے عالم کے مسلمانوں کے لیے قبول فرما۔ یا اللہ! ہم سب کے لیے تقویٰ کے راستےکو آسان بلکہ لذیذ فرمادیجیے۔ اے خدا! گناہوں کو چھوڑنا نہ یہ کہ آسان بلکہ لذیذ فرمادیجیےاور ہم سب کو اللہ والی حیات نصیب فرمادیجیے۔ اے خدا! گناہوں کو چھوڑ کر ہم ایک شکر نہیں کروڑ کروڑ شکر ادا کریں۔جس گناہ سے آپ ہمیں نجات عطا فرما دیں تو اے خدا! ہم اس عنوان سے شکر ادا کریں گے کہ اگر ساری دنیا کے ذرّے ذرّے زبان بن جائیں، ساری کائنات کے ہر ذرّےکی زبان سے اے اللہ! ہم آپ کا شکر ادا کریں تو ایک گناہ سے نجات کا شکریہ ہم ادا نہیں کرسکتے۔ اس لیے سارے گناہوں کو چھوڑ دینے کی توفیق عطا فرمادیجیے۔ اورہمیں اپنے دوستوں کی حیات نصیب فرمادیجیے، اختر کو بھی اور اس کی اولاد کو بھی اور میرے سب دوستوں کو بھی اور میرے حاضرین دوستوں کو بھی جو اس وقت موجود ہیں اور جو خواتین بے چاری آئی ہیں ان کے لیے بھی اور ان کے گھروالوں کے لیے، ان کے شوہروں کے لیے بھی، ان کے بچوں کے لیے بھی دعا کرتا ہوں کہ اے اللہ! ہم سب کو دونوں جہاں کی نعمتوں سے نواز دے۔اے مالکِ دو جہاں! ہم آپ سے دونوں جہاں کی بھیک مانگتے ہیں ؎دونوں جہاں کا دُکھڑا اختر ؔ تو رو چکا ہے اب اس پہ فضل کرنا یا رب ہے کام تیرا یہ خواجہ صاحب کا شعر ہے جس میں نام کی ترمیم کرکے اللہ سے مانگ لیا۔ وَاٰخِرُ دَعْوَانَا اَنِ الْحَمْدُ لِلہِ رَبِّ الْعَالَمِیْنَ وَصَلَّی اللہُ تَعَالٰی عَلٰی خَیْرِ خَلْقِہٖ مُحَمَّدٍ وَّاٰلِہٖ وَصَحْبِہٖ اَجْمَعِیْنَ بِرَحْمَتِکَ یَااَرْحَمَ الرَّاحِمِیْنَ