Deobandi Books

وہ اس قدر پھولا کہ راستہ بند ہوگیا۔ ابن عمرؓ نے اس کو مارنا شروع کیا۔ حضرت حفصہؓ کو خبر ہوئی تو بولیں: تم کو اس سے کیا غرض؟ تمہیں معلوم نہیں کہ آنحضرتﷺ نے فرمایا ہے کہ دجا۔ّل کے خروج کا محرک اس کا غصہ ہوگا۔5 
حضرت حفصہؓ کے مزاج میں ذرا تیزی تھی۔ آنحضرتﷺ سے کبھی کبھی دو بدو گفتگو کرتیں اور برابر کا جواب دیتی تھیں، چنانچہ صحیح بخاری میں خود حضرت عمرؓ سے منقول ہے کہ ’’ہم لوگ جاہلیت میں عورتوں کو ذرا برابر بھی وقعت نہ دیتے تھے، اسلام نے ان کو درجہ دیا اور قرآن میں ان کے متعلق آیتیں اُتریں تو انکی قدر و منزلت معلوم ہوئی۔ ایک دن میری بیوی نے کسی معاملہ میں مجھ کو رائے دی، میں نے کہا: تم کو رائے و مشورہ سے کیا واسطہ؟ بولیں: ابن خطاب! تم کو ذرا سی بات کی بھی برداشت نہیں، حالانکہ تمہاری بیٹی رسول اللہﷺ کو برابر کا جواب دیتی ہے یہاں تک کہ آپ دن بھر رنجیدہ رہتے ہیں۔ میں اُٹھا اور حفصہؓ کے پاس آیا۔‘‘ میں نے کہا: بیٹی! میں نے سنا ہے تم رسول اللہﷺ کو برابر کا جواب دیتی ہو؟ بولیں: ہاں! ہم ایسا کرتے ہیں۔ میں نے کہا: خبردار! میں تمہیں عذابِ الٰہی سے ڈراتا ہوں، تم اس عورت (حضرت عائشہؓ) کی رِیس نہ کرو جس کو رسول اللہﷺ کی محبت کی وجہ سے اپنے حسن پر ناز ہے1۔‘‘ 
ترمذی میں ہے کہ ایک دفعہ حضرت صفیہؓ رو رہی تھیں، آنحضرتﷺ تشریف لائے اور رونے کی وجہ پوچھی، انہوں نے کہا کہ مجھ کو حفصہؓ نے کہا ہے کہ ’’تم یہودی کی بیٹی ہو۔‘‘ آپ نے فرمایا: ’’حفصہ! خدا سے ڈرو۔‘‘ پھر حضرت صفیہؓ سے ارشاد ہوا: ’’تم نبی کی بیٹی ہو، تمہارا چچا پیغمبر ہے اور پیغمبر کے نکاح میں ہو، حفصہ تم پر کس بات میں فخر کرسکتی ہے2۔‘‘ 
ایک بار حضرت عائشہؓ اور حضرت حفصہؓ نے حضرت صفیہؓ سے کہا کہ ’’ہم رسول اللہﷺ کے نزدیک تم سے زیادہ معزّز ہیں، ہم آپ کی بیوی بھی ہیں اور چچازاد بہن بھی۔‘‘ حضرت صفیہؓ کو ناگوار گزرا، انہوں نے آنحضرتﷺ سے اس کی شکایت کی، آپ نے فرمایا کہ’’ تم نے یہ کیوں نہیں کہا کہ تم مجھ سے زیادہ کیوں کر معزّز ہوسکتی ہو؟ میرے شوہر محمدﷺ ، میرے باپ ہارونؓ اور میرے چچا موسیٰؓ ہیں3۔‘‘
حضرت عائشہ اور حضرت حفصہؓ حضرت ابوبکر صدیق و حضرت عمرؓ کی بیٹیاں تھیں جو تقرّبِ نبویﷺ میں دوش بدوش تھے اس بنا پر حضرت حفصہ اور حضرت عائشہؓ بھی دیگر ازواج کے مقابلہ میں باہم ایک تھیں، چنانچہ واقعہ تحریم جو ۹ہجری میں پیش آیا، اسی قسم کے اتفاق کا نتیجہ تھا۔ ایک مرتبہ کئی دن تک آنحضرتﷺ حضرت زینبؓ کے پاس معمول سے زیادہ بیٹھے جس کی وجہ یہ تھی کہ حضرت زینبؓ کے پاس کہیں سے شہد آگیا تھا انہوں نے آپ کے سامنے پیش کیا آپ کو شہد بہت مرغوب تھا آپ نے نوش فرمایا، اس میں وقتِ مقررہ سے دیر ہوگئی حضرت عائشہؓ کو رشک ہوا تو حضرت حفصہؓ سے کہا: رسول اللہﷺ جب ہمارے اور تمہارے گھر میں آئیں تو کہنا چاہیے کہ آپ کے منہ سے مغافیر کی ۔ُبو آتی ہے۔1  (مغافیر کے پھولوں سے شہد کی مکھیاں رس چوستی ہیں)