ماہنامہ انوار مدینہ لاہور دسمبر 2016 |
اكستان |
|
کی خدمت میں حاضر ہو کرگزارش کریں گے کہ اے حبیب ِ رب العالمین آپ کی گناہگار اُمت کی تباہ حالی دیکھ کر حاضر خدمت ہوا ہوں اے محبوب رب العالمین آپ کی نافرمان اُمت نہایت لجاجت کے ساتھ رو رو کر سلام عرض کرتی تھی اور یہ التجا کرتی تھی کہ خدا کے لیے ہمارے حالِ زار کی خبر لیجیے۔ شفیع المذنبین اِس خبر کے سنتے ہی فرمائیں گے لَبَّیْکَ یَا اُمَّتِیْ اے میرے اُمتی، تمہارا نبی تمہاری سفارش کے لیے حاضر ہے اور اپنے مقامِ محمود سے رخصت ہوکرعرشِ الٰہی کے نیچے حاضر ہو کر ایک مرتبہ سر بسجود ہوں گے اور خداتعالیٰ کی بارگاہ میں ایسی ایسی تعریف و توصیف کریں گے جوسارے جہان میں کسی نے نہیں کی ہوگی، اِس حالت میں خداجانے کتنا عرصہ گزر جائے گا۔ ارشادِ باری تعالیٰ ہوگا یَا مُحَمَّدُ اِرْفَعْ رَأْسَکَ سَلْ تُعْطَہْ وَاشْفَعْ تُشَفَّعْ ١ اے ہمارے محبوب سر اُٹھاؤ بولو کیا چاہیے جو کچھ مانگو گے ملے گا جو سفارش کرو گے قبول ہوگی، یہ سنتے ہی رحمة للعالمین سجدہ سے سر اُٹھائیں گے اورزبانِ مبارک پر یَارَبِّ اُمَّتِیْ اُمَّتِیْ کی صدائیں ہوں گی ارشادِ باری ہوگا جاؤ جس نے تمام عمر میں صدقِ دل سے ایک دفعہ بھی لَا اِلٰہَ اِلَّا اللّٰہُ کہہ لیا اور شرک نہیں کیا خواہ کتنا ہی بڑا گناہگار کیوں نہ ہو اُس کو جہنم سے نکال لو، اجازت پاتے ہی آپ مسلمانوں کو اطلاع دیں گے : اے لو گو ! محمد(ۖ) نے معافی کا پروانہ حاصل کر لیا ہے، اے جنت والو ! میرے ساتھ چلو اور تم جس کو پہچان سکو جہنم سے نکال لو۔ اِرشاد سنتے ہی اہلِ جنت آپ کے ہمراہ ہو لیں گے پھریہ قافلہ دوزخ کی طرف کوچ کرے گا، مالکِ داروغہ دوزخ آپ کو دیکھتے ہی با ادب کھڑے ہوجائیں گے، آپ دریافت کریں گے : اے مالک ! جلدی بتاؤ میری گنہگار اُمت کا کیا حال ہے ؟ مالک عرض کریں گے کچھ نہ پوچھیے، آپ فرمائیں گے بہت جلد جہنم کے دروازے کھولو، مالک حکم پاتے ہی جہنم کا دروازہ کھول دیں گے، جب جہنمیوں کی آپ کے چہرۂ انور اور جمالِ مبارک پر نظر پڑے گی تو بے ساختہ اپنی زبانوں سے یَا مُحَمَّدُ اَحْرَقَتِ النَّارُ جُلُوْدَنَا وَاَکْبَادَنَا وَوُجُوْھَنَا یعنی ''سرکار آگ نے ہمارے جسم اور ہمارے کلیجے جلا ڈالے اور چہرے جھلس دیے ''کا شور مچائیں گے،١ بخاری شریف کتاب تفسیر القرآن رقم الحدیث ٤٧١٢