ماہنامہ انوار مدینہ لاہور جون 2014 |
اكستان |
 |
قسط : ٢٧ سیرت خُلفا ئے راشد ین ( حضرت مولانا عبدالشکور صاحب فاروقی لکھنوئی ) اَمیر المؤمنین حضرت عثمان بن عفّان ذوالنّورین حضرت عثمان کے عہد ِخلافت کی فتوحات : آپ کے عہد ِخلافت میں دو قسم کی فتوحات حاصل ہوئیں: اَوّل یہ کہ بعض وہ ممالک جو حضرت فاروق رضی اللہ عنہ کے زمانے میں مفتوح ہو چکے تھے اور پھر اُن کے بعد باغی ہوگئے، حضرت عثمان کے زمانے میں وہ ممالک دوبارہ پھر فتح کیے گئے۔ دوم یہ کہ جدید ممالک میں جہاد ہوئے وہ مقامات اِسلام کے قبضہ میں آئے، یہاں اِن دونوں قسموں کی فتوحات کا تذکرہ بطورِ نمونے کے کیاجاتا ہے۔ قسم اَوّل : ٭ ہمدان کے لوگ باغی ہوگئے، حضرت مغیرہ بن شعبہ رضی اللہ عنہ کے ہاتھ پر دوبارہ یہ ملک فتح ہوا۔ ٭ رَی کے لوگوں نے بھی علَمِ بغاوت بلند کیا، حضرت اَبوموسٰی اَشعری رضی اللہ عنہ اور حضرت براء بن عازب رضی اللہ عنہ کے ذریعہ سے اَزسر نو اِس پراِسلام کا قبضہ ہوا۔ ٭ اِسکندریہ میں بھی بغاوت کی آگ بھڑکی، حضرت عمرو بن عاص رضی اللہ عنہ کی کوشش سے پھر یہ مقام فتح ہوا۔ ٭ آذر بائیجان کے لوگوں نے بھی غدر کیا، حضرت ولید بن عتبہ رضی اللہ عنہ کی کوشش سے پھر مسلمانوں کا اِس پر تسلط ہوا۔ اِسی سلسلہ میں آذر بائیجان کے قرب و جوار کے مقامات بھی مفتوح ہوگئے، آرمینیہ بھی مفتوح ہوا۔