ماہنامہ انوار مدینہ لاہور ستمبر 2006 |
اكستان |
|
جامعہ مدنیہ جدید کی ایک پُروقار اور تاریخی تقریب کی مختصر رُوداد ( بقلم مولانا محمد عابد صاحب، فاضل جامعہ مدنیہ لاہور ) ١٨ رجب المرجب مطابق ١٤ اگست بروز پیر کو بعد نماز ِ مغرب جامعہ مدنیہ جدید کی مسجد حامد میں بخاری شریف کی تکمیل کے سلسلہ میں ایک پروقار تقریب کا انعقاد ہوا۔ اِس تقریب کی صدارت مخدوم المشائخ حضرت اقدس سید نفیس الحسینی شاہ صاحب دامت برکاتہم نے فرمائی۔ اِس تقریب کا باقاعدہ آغاز جناب حافظ فرید احمد صاحب شریفی کی تلاوتِ کلام پاک سے ہوا۔ اس کے بعد جامعہ مدنیہ جدید کے فاضل مولانا غلام اللہ فاروقی نے سرائیکی میں ہدیۂ نعت پیش کیا۔ ہدیۂ عقیدت کے بعد جامعہ مدنیہ جدید کے اُستاذ الحدیث حضرت مولانا محمد حسن صاحب مدظلہم نے تفصیلی بیان فرمایا۔ آپ نے اپنے بیان میں اکابرین کی رفعت ِ شان کے سلسلہ میں ترغیبی واقعات سُنائے۔ علماء و اَکابر کے ادب و احترام پر زور دیا، علم سیکھنے کی ترغیب دی۔ بعد ازاں حضرت بانی جامعہ رحمة اللہ علیہ کے نواسے جناب سعد الاسلام صاحب نے نعتیہ کلام پیش کیا۔پھر جامعہ قاسمیہ رحمن پورہ لاہور کے مہتمم حصرت مولانا شاہ محمد صاحب مدظلہم نے اصلاحی بیان فرمایا اور کلمات ِ تبریک پیش کیے۔ اس کے بعد حضرت مولانا خالد محمود صاحب مدظلہم، اُستاذ الحدیث و ناظم ِ تعلیمات جامعہ مدنیہ جدید نے حضرت اقدس بانی ٔ جامعہ رحمہ اللہ کی شخصیت، جامعہ مدنیہ جدید و خانقاہِ حامدیہ اور الحامد ٹرسٹ کا تفصیلی تعارف پیش کیا۔ اس موقع پر دو کتابچے تقسیم کیے گئے، ایک الحامد ٹرسٹ کی جانب سے ''خدمات و تعارف'' کے عنوان سے تھا جبکہ دوسرا خانقاہِ حامدیہ کی طرف سے ''ہر مسلمان کے لیے دن رات کے مختصر معمولات'' کے عنوان سے تھا۔ مولانا غلام اللہ میواتی اور مولانا عقیل احمد میواتی (جو میواتی برادران کے نام سے معروف ہیں) نے اِسی سال جامعہ مدنیہ جدید میں دورۂ حدیث شریف کی تکمیل کی ہے۔ اِن دونوں نے اپنے اِس تعلیمی سال کی تکمیل کی خوشی میں ایک پُر اثر دُعائیہ نظم تیار کی اور نہایت پُر سوز انداز میں پڑھ کر حاضرین سے دادِ تحسین لی۔ اِس کے بعد ایک نعتیہ کلام انہی میواتی برادران نے مزید پڑھ کر سنایا۔