ماہنامہ انوار مدینہ لاہور اگست 2004 |
اكستان |
 |
نبی کریم ۖ کے مسواک کرنے کے اوقات : مسند احمد میں ام المؤمنین سیدہ عائشہ صدیقہ رضی اللہ عنہا سے روایت ہے کہ نبی کریم صلی اللہ علیہ وسلم رات کے وقت جب گھر میں تشریف لاتے تو سب سے پہلے مسواک کرتے تھے اور جس وقت بھی نیند سے بیدار ہوتے تو مسواک ضرور کرتے تھے تاکہ منہ پاک صاف کر کے اپنے پروردگار سے ہمکلام ہوں ۔ چنانچہ ام المؤمنین سیدہ عائشہ صدیقہ رضی اللہ تعالیٰ عنہا فرماتی ہیں: حضور اقدس صلی اللہ علیہ وسلم رات یا دن کے وقت جب بھی سوکر اٹھتے تو وضو سے پہلے مسواک کرتے تھے۔ مسواک کا ساتھ رکھنا : حضرت زید بن خالد رضی اللہ تعالیٰ عنہ سے روایت ہے کہ جب نبی کریم ۖ نے مسواک کرنے کی باربار تاکید فرمائی تو صحابہ کرام رضوان اللہ علیہم اجمعین نے مسواک ہر وقت اپنے پاس رکھنے کا معمول بنا لیا تھا۔ گھر میں داخل ہوتے وقت مسواک : ام المؤمنین سیدہ عائشہ صدیقہ رضی اللہ تعالیٰ عنہا سے دریافت کیا گیا کہ نبی کریم صلی اللہ علیہ وسلم جب گھر میں داخل ہوتے تو سب سے پہلے کیا کام کرتے تھے؟ انہوں نے فرمایا کہ آپ صلی اللہ علیہ وسلم مسواک فرمایا کرتے تھے۔ گھر سے نکلتے وقت مسواک : حضرت زید بن خالد رضی اللہ تعالیٰ عنہ سے روایت ہے کہ نبی کریم ۖ گھر سے نماز کے لئے نکلتے تو مسواک کر کے نکلتے تھے۔ روزہ دار کے لئے مسواک : جس طرح نماز اور جمعہ کے لئے مسواک کا حکم ہے اسی طرح روزہ دار کیلئے بھی مسواک کی بہت بڑی فضیلت ہے۔ چنانچہ ام المؤمنین سیدہ عائشہ صدیقہ رضی اللہ تعالیٰ عنہا سے روایت ہے کہ نبی کریم ۖ نے فرمایا : ''روزہ دار کی بہترین عادات میں سے مسواک کرنا بھی ہے۔'' تلاوت ِقرآن کے لئے مسواک : سیدنا علی المرتضی رضی اللہ تعالی عنہ سے روایت ہے کہ ''لوگو! تمہارے منہ قرآن مجید کے راستے ہیں اس لئے انہیں مسواک سے اچھی طرح صاف کرو۔''