لا زوال سلطنت |
ہم نوٹ : |
 |
بنالو ان شاء اﷲاس سے ہی کام بن جائے گا،لہٰذا جب کبھی کوئی غم آئے مثلاً اصلاح نہ ہورہی ہو، کوئی روحانی بیماری نہ جارہی ہو، بچہ بیمار ہو یا خود بیمار ہوں، غرض کوئی بھی پریشانی یا بیماری ہو تو ڈاکٹر پر یا تدابیر پر زیادہ بھروسہ مت کرو، یہ پیالے ہیں اور پیالوں سے کچھ نہیں ملے گا، پیالوں میں بھیک کوئی اور دیتا ہے،صحت بھی اﷲ کے یہاں سے ملے گی، تندرستی بھی وہاں سے ملے گی اور دشمن بھی وہیں سے مغلوب ہوگا، لہٰذا جب کبھی کوئی دشمن ستائے تو سمجھ لو کہ یہ اُن کے اُبھارے ہوئے ہیں ؎ بھلا اِن کا منہ تھا میرے منہ کو آتے یہ دشمن اُن ہی کے اُبھارے ہوئے ہیں لہٰذا جب ان کو راضی کرلو گے تو ہماری نالائقی اور گناہوں کے کتے پن کے سبب دشمنوں کے جو شیر ہم پر مسلط کیے گئے تھے وہ ہٹا لیے جائیں گے۔ مولانا رومی کی دعا ہے ؎ گر سگی کردیم اے شیر آفریں شیر را مگمار بر ما زیں کمیں اے خدا! مجھ سے تو کتا پن ہوگیا، بدنظری ہوگئی، گناہ ہوگئے، لیکن آپ ہم پر رحم فرمائیے، ہمارے گناہوں کو بخش دیجیے اور اپنے شیر کو ہماری پیٹھ پر سے ہٹادیجیے۔ ان شاء اﷲ استغفار اور دعا کی برکت سے وہ دشمن کو نرم کردیں گے۔ جو شیروں کو مسلط کرنا جانتے ہیں وہ بھگانا بھی جانتے ہیں، بلکہ انہیں مسخر کرکے آپ کا غلام بھی بنا سکتے ہیں۔ اب دعا کرلیجیے کہ اﷲ تعالیٰ عمل کی توفیق عطا فرمائے۔ یا اﷲ! سب سے پہلے اختر محتاج ہے، اس مجلس میں میرے بزرگ بھی موجود ہیں، حکیم الامت کو دیکھے ہوئے لوگ بھی ہیں، میں ان سے اور سارے صالحین سے عرض کرتا ہوں کہ سب سے زیادہ محتاج اختر ہے ، دعا کیجیے کہ یا اﷲ! جو کچھ اس مقرر نے کہا اس پر زیادہ سے زیادہ عمل کی توفیق عطا فرمادے۔یہ مجلس صیانۃ المسلمین حکیم الامت حضرت تھانوی رحمۃ اﷲ علیہ کی قائم کی ہوئی ہے اِس کی برکت سے آج یہاں پورے ملک سے لوگ آئے ہوئے ہیں یا اﷲ! اس مبارک مجلس کو قبول فرمالے اور حکیم الامت کے نام کی نسبت کے صدقے میں ہم سب کو صاحبِ نسبت بنادے