آداب عشق رسول صلی اللہ علیہ و سلم |
ہم نوٹ : |
 |
حضور صلی اللہ تعالیٰ علیہ وسلم کی محبت کا حق وہ ادا کرتا ہے جو گناہ چھوڑ دے اور اللہ تعالیٰ پر اپنی جان فدا کردے۔ میرا شعر ہے ؎وہ لمحۂ حیات جو تجھ پر فدا ہوا اس حاصلِ حیات پہ اخترؔ فدا ہوا جو سانس اللہ تعالیٰ پر فدا ہو،سرورِ عالم صلی اللہ تعالیٰ علیہ وسلم کی سنت پر فدا ہو،یہ ہے اصلی مولود شریف۔ ایک ایک سنت کو سیکھیے اور اس پر عمل کیجیے،یہ ہے ربیع الاوّل۔ حضور صلی اللہ تعالیٰ علیہ وسلم اسی لیے تشریف لائے تھے۔ سرورِ عالم صلی اللہ تعالیٰ علیہ وسلم اس لیے تشریف نہیں لائے تھے کہ سال میں ایک دفعہ ہندوؤں کی دیوالی کی طرح مسجدوں میں چراغاں کرلو، جلوس اور ریلیاں نکال کر گانے بجانے کرو اور گھروں میں وی سی آر، سینما، ٹی وی چلاؤ۔ آہ! گانا بجاناگھر سے نہ نکلااور دعویٰ ہےعشقِ رسول کا۔ سرورِ عالم صلی اللہ تعالیٰ علیہ وسلم نے ارشاد فرمایا: میں گانا بجانا مٹانے کے لیے پیدا کیاگیا ہوں اور آج سب کے گھر میں خوب گانے بجانے ہو رہے ہیں، ٹھیلے والے بھی گانے بجا رہے ہیں، سبزی بیچ رہا ہے اور گانے بجانے چل رہے ہیں۔ بتاؤ! اس امت کا کیا حال ہے؟ سب سے بڑا ربیع الاوّل یہ ہے کہ ہم گناہ چھوڑ دیں۔ سب سے بڑا ربیع الاوّل یہ ہے کہ ہم حضور صلی اللہ تعالیٰ علیہ وسلم کی ایک ایک سنت کو عملی طور پر اختیار کریں اور حضور صلی اللہ تعالیٰ علیہ وسلم پر رات دن درود شریف پڑھیں، یہ ہے اصلی چیز۔ درود شریف کے فضائل ایک مرتبہ درود شریف پڑھنے پر دس نیکیاں ملتی ہیں، دس گناہ معاف ہوتے ہیں، دس درجے بلند ہوتے ہیں۔ میرے شیخ شاہ عبدالغنی صاحب رحمۃاللہ علیہ نے فرمایا کہ جب بندہ کہتا ہے اَللّٰھُمَّ صَلِّ عَلٰی مُحَمَّدٍ وَّعَلٰی اٰلِ مُحَمَّدٍ تو اللہ تعالیٰ کا نامِ مبارک بھی منہ سے نکلا اور حضور صلی اللہ تعالیٰ علیہ وسلم کا نامِ مبارک بھی منہ سے نکلا، تو بندہ دونوں کریم کے درمیان میں ہوجاتا ہے، اس کے دونوں ہاتھ میں لڈو ہوتا ہے، اﷲ تعالیٰ کے نام کا لڈو اور حضور صلی اﷲ تعالیٰ علیہ وسلم کے نام کا لڈو ؎دل کو تھاما ان کا دامن تھام کے ہاتھ میرے دونوں نکلے کام کے