درس مثنوی مولانا روم رحمہ اللہ |
ہم نوٹ : |
 |
مجلس درسِ مثنوی ۲۰؍ رمضانُ المبارک ۱۴۱۸ھ مطابق ۱۹؍ جنوری ۱۹۹۸ء بروز دوشنبہ بعد فجر مقام خانقاہ امدادیہ اشرفیہ، گلشن اقبال، بلاک۲، کراچی تازگیٔ ہر گُلستانِ جمیل ہست بربارانِ پنہانی دلیل ارشاد فرمایا کہ صبح دم جب باغوں کے پتّے ہرے ہرے نظر آئیں اور ان کا مُنہ دھلا ہوا دکھائی دے تو سمجھ لو کہ رات میں بارش ہوئی ہے۔ پتّو ں کی یہ تازگی رات کی پوشیدہ بارش کی دلیل ہے۔ تو مولانا رومی فرماتے ہیں کہ جس طرح سے ہر باغ کا ہرا بھرا ہونا اور پتّوں کا دھلا ہوا ہونا دلیل ہے کہ رات کو بارش ہوئی ہے ایسے ہی اللہ والوں کے کلام میں جو علوم و معارف بیان ہوتے ہیں یہی دلیل ہے کہ ان کے قلب پر رات میں اللہ تعالیٰ کی رحمت کی بارش ہوئی تھی۔ ان کے الفاظ و مضامین علومِ غیبیہ اور الہام من اللہ کے غماز ہوتے ہیں۔ چوں او خواہد عینِ غم شادی شوَد عین بندِ پائے آزادی شوَد ارشاد فرمایا کہ جب اللہ چاہتا ہے تو غم کی ذات کو خوشی بنادیتا ہے۔ سائنس داں تو پہلے غم کے اسباب کو ہٹائیں گے اور خوشی کے اسباب کو لائیں گے لیکن اللہ تعالیٰ کو اسبابِ غم کو ہٹانے کی ضرورت نہیں ہے۔ وہ غم کی ذات ہی کو کُنْ فَیَکُوْنُ سے خوشی میں بدل دیتے ہیں۔ اللہ میاں کو غم ہٹانے کی ضرورت نہیں پڑتی۔ وہ غم کی عینیتِ مصطلحہ کو خوشی میں تبدیل کردیتے ہیں یعنی اسی غم کو خوشی بنادیتے ہیں اور جس