درس مثنوی مولانا روم رحمہ اللہ |
ہم نوٹ : |
 |
مجلسِ درسِ مثنوی ۱۹؍ رمضانُ المبارک ۱۴۱۸ھ مطابق ۱۸؍جنوری ۱۹۹۸ء بروز اتوار بعد نماز فجربوقت ساڑھے چھ بجے، مقام خانقاہ امدادیہ اشرفیہ، گلشن اقبال بلاک۲، کراچی دستِ ماچوپائے مارامی خورد بے امانِ تو کسے جاں کے بَرد ارشاد فرمایا کہ آہ! کیا درد بھرا شعر ہے۔ مولانا جلالُ الدین رومی کا مقام ان کےکلام سے پتا چلتا ہے کہ یہ کتنا بڑا شخص ہے۔فرماتے ہیں کہ اے اللہ! میرا ہی ہاتھ میرے پیر کو کھارہا ہے‘ دوسرا ہم کو نقصان نہیں پہنچارہاہے، میں خود اپنے ہاتھوں سے گُناہ کرکے اپنے پاؤں پر کلہاڑی مار رہا ہوں لہٰذا بغیر آپ کے کرم اور آپ کی حفاظت اور آپ کی پناہ اور تحفظ کے کون اپنی جان کو سلامتی سے لے جاسکتا ہے۔ کیا عاجزی ہے اور کیا درخواست ہے، کیا پیارا مضمون ہے اور کتنا نور ہے اس شعر میں۔ اور کس پیارے انداز سے مولانا گُناہوں سے تحفظ اور پناہ کی اللہ تعالیٰ سے درخواست کررہے ہیں کہ اللہ! آپ ہمیں اپنی امان میں لے لیجیے تب ہی ہم گُناہوں سے بچ سکتے ہیں۔ جب اللہ تعالیٰ کا فضل ہوتا ہے تو گناہوں کے ہزاروں جال قدموں پر آجائیں تو بھی آدمی ان سے بچ جاتا ہے مثلاً گُناہ خود اس کے پاس پہنچ جائے تو جس کو اللہ تعالیٰ بچانا چاہتے ہیں تو اوّل نظر پڑتے ہی گُناہ کی آخری منزل کی غلاظت اس کے سامنے آجاتی ہے جس کو میں کہتا ہوں کہ ناف کے اوپر فرسٹ فلور ہے اور ناف کے نیچے گراؤنڈ فلور ہے تو جس پر اللہ کا کرم ہوتا ہے تو فرسٹ فلور پر نظر پڑتے ہی اس کو گراؤنڈ فلور کی گندگی کا ایکسرے سامنے آجاتا ہے کہ یہ چہرہ اور آنکھیں اور یہ گال اور بال تم کو گراؤنڈ فلور کی گٹر لائنوں میں لے جائیں گے اور تمہاری تقدس مآبی کو شیطانیت میں تبدیل کردیں گے۔ یہ میں درس اور سبق نہیں دے رہا ہوں تصوّف اور سلوک کی جان پیش کررہا ہوں اور دردِ دل سے