ماہنامہ انوار مدینہ لاہور فروری 2017 |
اكستان |
 |
بچہ نے قرآن شریف سیکھنا شروع کیا ہے اُستاد سکھانے والے ہیں اور آپ کی کوشش ہے توسکھانے والوں میں آپ بھی شامل ہیں اور آپ بھی بہت اچھے ہیں، خدا کرے آپ کا بچہ قرآن شریف پڑھے اُس کو سمجھے اُس پر عمل کرے توآپ کو بھی اور بچہ کی والدہ کو بھی قیامت کے روز ایسا تاج پہنا یا جائے گا جس کی روشنی دُنیا کے آفتاب کی روشنی سے کہیں بہتر ہوگی۔ ١ مگر دیکھئے اِس مبارک موقع پر جو کچھ آپ کریں اللہ کے لیے کیجئے نام و نمود کے لیے نہ کیجئے، جب بچہ بولنے لگے اُس کو'' اللہ'' کا نام سکھاؤ ''کلمہ ''سکھاؤ پھر کسی دیندار بزرگ متبرک کی خدمت میں لے جا کر'' بسم اللہ'' کہلا دو اور اِس نعمت کے شکریہ میں اگر دل چاہے اور بِلا پابندی کے جو کچھ توفیق ہو خدا کی راہ میں خیرات کردو، چھپا کر خیرات کرو تو اُس کا ثواب زیادہ ہوگا۔ ایسے ہی قرآن شریف ختم ہونے کے وقت جو کچھ کرو اللہ کے لیے کرو، نام و نمود کے لیے نہ کرو، کسی رسم کے پیچھے ہر گز نہ پڑو کہ اِس سے نیکی برباد گناہ لازم آتا ہے ،اُستاد کی خدمت خوش دلی سے دل کھول کر کرو مگر احسان جتانے کے لیے نہیں اور نمائش یہاں بھی نہ ہونی چاہیے اسلام کی تعلیم یہی ہے۔ آنحضرت ۖ کااِرشاد ہے : مَنْ سَمَّعَ سَمَّعَ اللّٰہُ بِہ وَمَنْ یُرَائِیْ یُرَائِی اللّٰہُ بِہ۔ ٢ جو شہرت کے لیے کام کرتا ہے اللہ تعالیٰ قیامت کواُس کی تشہیر کرائے گا اور عام اعلان کرائے گا کہ اِس نے یہ کام اللہ کے لیے نہیں بلکہ شہرت کے لیے کیاتھا اور جودکھا وا کرتا ہے قیامت کے دن اللہ تعالیٰ اُس کی نمائش کرائے گا یعنی نمائشی کاموں سے دُنیا میں جتنی شہرت اور نام آ وری ہوئی تھی قیامت کے روز اُس سے کہیں زیادہ رسوائی اور ناکامی ہوگی کیونکہ یہاں جوکچھ بھی ہوا وہ ایک محدود علاقہ اور محدود جماعت میں ہوا اور قیامت کے روز تمام مخلوق میدانِ حشر میں ہوگی اُس کا علاقہ بہت وسیع اوراُس کی گنتی بے شمار ہوگی۔ معاذ اللہ ! (جاری ہے) ------------------------------ ١ مشکوة شریف بحوالہ احمد و ابوداو دشریف ٢ مشکوة شریف کتاب الرقاق رقم الحدیث ٥٣١٦