سے جو قبول نہ ہو۔‘‘
علم کا سب سے پہلا مطالبہ یہ ہے کہ آدمی اپنی زندگی کا جائزہ لیوے، اور اپنے نفس کو سدھارنے میں علم کی دولت خرچ کرے، حقیقی عالم وہی ہے جو علم پر عمل کرتا ہے حضرت ابوالدرداء نے فرمایا کہ بلاشبہ قیامت کے روز اللہ تعالیٰ کے نزدیک بدترین لوگوں میں وہ عالم (بھی) ہوگا جو اپنے علم سے نفع حاصل نہیں کرتا(یعنی اپنے علم پر عمل کرکے اپنی اصلاح نہیں کرتا)
حضرت عمر نے جناب کعب الاحبار سے فرمایاکہ بتاؤ علم والے کون ہیں؟ عرض کیا علم والے وہ ہیں جو (علم) پر عمل کرتے ہیں ، حضرت عمر نے پھر فرمایا کہ بتاؤ علم (کی عظمت اور اس کے وقار) کو کس چیز نے نکالا (علماء کے دل سے) عرض کیا لالچ نے نکال دیا (مشکوٰۃ شریف)
حضرت امام ابوحنیفہ نے فرمایا:
الفقہ معرفۃ النفس مالہا وما علیہا
’’اپنے نفس کی ذمہ داریوں کے پہچاننے اور نفس کو نقصان وضرر میں ڈالنے والی باتوں کے جاننے کا نام فقہ ہے۔‘‘
نیز ارشاد فرمایا:
ما العلم الا للعمل بہ والعمل بہ ترک العاجل لاجل
’’علم عمل ہی کرنے کے لئے ہے اور علم پر عمل کرنا یہ ہے کہ آخرت کے نفع کے لئے دنیا کے نفع کو چھوڑ دے۔‘‘
اس کو نقل فرما کر صاحب ’’تعلیم المتعلم ‘‘ لکھتے ہیں انسان کو چاہیے کہ (علم ہونے پر) اپنے نفس سے اور نفس کے نفع ونقصان سے غافل نہ ہوجاوے نفع کے اعمال کرے، اور نقصان کے کاموں سے بچے تاکہ عقل اورعلم خود اسی کے خلاف غالب دشمن بن کر عذاب میں اضافہ کا باعث نہ بنے نعوذ باللہ من سخطہ وعقابہ۔
حضرت امام شافعی نے فرمایاکہ ایک صاحب حکمت نے دوسرے صاحب کو لکھا کہ تجھے علم دیا گیا ہے اسے گناہوں کے اندھیرے سے خراب نہ کر، ورنہ تو اس روز اندھیرے میں رہ جائے گاجبکہ اہل علم اپنے علم کے نور میں دوڑ رہے ہوں گے۔
حضرت حسن بصری سے ایک شخص نے کہا کہ فقہا آپ کی مخالفت کرتے ہیں انہوں نے فرمایاتم نے کوئی فقیہ اپنی آنکھ سے دیکھا بھی ہے؟ فقیہ وہ ہے جو دنیا سے بے رغبت ہو، آخرت کا طلبگار ہو، اپنی دینداری کو پرکھتا ہو، اپنے رب کی عبادت میں لگا رہتا ہو اپنے نفس کو مسلمانوں کی بے آبروئی کرنے سے محفوظ رکھتا ہو ان کے مالوں سے بچتا ہو اور ان کا ہمدرد ہو (احیاء
