اور صرف رشک کیا کرے یہ حماقت اور بزدلی ہے نماز، روزہ، ذکر، تسبیح، تلاوت ایسے اعمال ہیں کہ ہلدی،پھٹکری کچھ خرچ نہیں ہر شخص انجام دے سکتا ہے ان اعمال میں کسی کو بڑھا ہوا دیکھے تو خود بھی کرنے لگ جائے البتہ وہ کام جن سے دوسروں کو نفع پہنچے اور مخلوق کی دنیا وآخرت سدھرے اور سنورے اگر ایسے کام انجام دیتے ہوئے کسی کو دیکھے اور خود طاقت نہ ہو تو البتہ رشک کرے اور یہ چیز قابل رشک اس لئے ہے کہ اپنے ذاتی اعمال انجام دیتے ہوئے مال سے اور علم سے خدمت میں لگنا بہت بڑی سعادت ہے اور اس کے اجور وثواب بے انتہا ہیں۔
حضور اقدس ﷺنے حدیث بالا میں اسی حقیقت کا اظہار فرمایا ہے کہ مال اور علم تو ہزاروں لاکھوں کے پاس ہے صرف مالدار اور عالم ہونے سے کسی کو کیا نفع؟ ہاں اس مال اور علم کا اگر دہانہ کھلا ہو اور مخلوقِ خدا سیراب ہورہی ہو اور اپنی دینی ودنیاوی ضرورتوں کے لئے آنے والے محروم نہ جاتے ہوں تو یہ مال وعلم در حقیقت قابل رشک ہے ایسا بننے کی تمنا کرنا درست ہے مگر مال کو گناہوں میں خرچ کرنے والے پر رشک کرنا گناہ ہے۔
معلم ومبلغ کے لئے دعائیں اور عابد پر عالم کی فضیلت
(۹) {وعن ابی امامۃ الباہلی ؓ قال ذکر لرسول اللہ ﷺرجلان احدہما عابد والآخر عالم فقال رسول اللہ ﷺفضل العالم علی العابد کفضلی علی ادناکم ثم قال رسول اللہ ﷺ ان اللہ وملٰئکتہ واہل السموات والارض حتی النملۃ فی حجرھا وحتی الحوت لیصلون علی معلم الناس الخیر} (رواہ الترمذی)
’’حضرت ابو امامہؓسے روایت ہے کہ حضور ﷺکی خدمت میں دو شخصوں کا ذکر ہوا (یعنی) ایک عابد کا اور ایک عالم کا، ان دونوں کا ذکر سن کر آنحضرت صلی اللہ علیہ وسلم نے فرمایا کہ عالم کی فضیلت عابد پر ایسی ہے جیسے میری فضیلت تم میں سے ادنی مسلمان پر ہے اس کے بعد ارشاد فرمایا کہ بلاشبہ اللہ تعالیٰ اور اس کے فرشتے رحمت بھیجتے ہیں خیر سکھانے والے پر، اور آسمان والے اور زمین والے یہاں تک کہ چیونٹیاں اپنے بلوں میں اور مچھلیاں تک غرضیکہ آسمان وزمین کے اندر بسنے والے تمام خیر سکھانے والے کے لئے رحمت کی دعا کرتے ہیں ۔ ‘‘
اس حدیث پاک سے خیر کی تعلیم دینے والوں کی فضیلت معلوم ہوئی اور چونکہ یہ فضیلت میراث نبوی ﷺکی وجہ سے ہے اس لئے فضیلت بیان فرماتے ہوئے اس نسبت کو ملحوظ رکھا ہے اور کفضلی علی ادنکم فرمایا ہے۔
حضور اقدسﷺکی فضیلت ادنیٰ ترین امتی پر کس قدر ہے؟ اس کا اندازہ ہم تو نہیں کرسکتے آنحضرت ﷺکے بلند
