مقام اخلاص و محبت |
ہم نوٹ : |
 |
کہاں تک ضبطِ بے تابی کہاں تک پاسِ بدنامی کلیجہ تھام لو یارو کہ ہم فریاد کرتے ہیں دعوت اِلی اللہ کا مقام یہ ہے مقامِ دعوت۔ حضرت حکیم الامت رحمۃ اللہ علیہ فرماتے ہیں کہ ایک لڑکی نے اپنی ساس سے کہا کہ اماں جی! جب میرے بچہ پیدا ہو تو مجھ کو جگا دینا۔ ساس نے کہا بیٹی! جب تیرے بچہ ہوگا توتُو خود سارے محلے کو جگائے گی، تجھے جگانا نہیں پڑے گا۔ حضرت حکیم الامت رحمۃ اللہ علیہ فرماتے تھے کہ جب اللہ تعالیٰ کی محبت کا اتنا دردِ عظیم پیدا ہوجائے کہ بغیر اللہ تعالیٰ کے وہ چین نہ پائے جب تک ان کا نام نہ لے لے، جب تک ان کا ذِکر نہ کرے، جب تک اللہ تعالیٰ کا ذِکر اس کی زندگی کی اساس اور بنیاد اور ستون نہ بن جائے کہ بغیر اللہ کو یاد کیے اس کو اپنی زندگی بے کیف معلوم ہو،جیسے دال کے بغیر ابلے ہوئے چاول۔ جب سالن نہ ہوتو ابلے ہوئے چاول کیسے لگتے ہیں؟ نگلنا مشکل ہوتا ہے۔ جب تک یہ حال نہ ہوتو سمجھو کہ ابھی اللہ کی محبت کا ذرّہ بھی نہیں ملا۔ ایک مجذوب پر قبضِ باطنی طاری ہوا اور عبادت کی مٹھاس اس سے چھین لی گئی، تو وہ جنگل میں جاکر رو رہا تھا اور اللہ میاں سے یوں کہہ رہا تھا کہ ’’دلیا بنا بتھوا، اداس موری سجنی‘‘ یعنی میری زندگی بے کیف ہے۔ یہ پورپ کی بولی ہے، تعبیر کے لیےہر شخص کو اپنی زبان میں مانگنے کا حق حاصل ہے۔ پشتو میں اللہ تعالیٰ سے مانگو ، اُردو میں مانگو جس زبان میں چاہو مانگ سکتے ہو، اللہ تعالیٰ تو ہر زبان کا خالق ہے۔ (یہا ں پر حضرت والا نے بیان کے درمیان فرمایا کہ )اللہ تعالیٰ کی رحمت سے ریل گاڑی ہمارے لیے مدرسہ بن گئی ہے، اس پر اللہ تعالیٰ کا شکرا دا کیجیے۔ میں اپنے مالک کے اس کرم کا بے حد ممنون ہوں کہ مجھے اللہ تعالیٰ نے اتنے کان عطا فرمائے، اگر اکیلا بیٹھا رہتا اور کان نہ ہوتے تو زبان کیا کرتی ؎ہم بات کریں گے جو کوئی کان ملے گا یہ اللہ تعالیٰ کا احسان ہے کہ اتنے کان میری زبان کی طرف متوجہ ہیں ؎خلقے پسِ دیوانہ و دیوانہ بکارے