ماہنامہ انوار مدینہ لاہور ستمبر 2016 |
اكستان |
 |
دُنیا کے سب سے زیادہ دولت مند اور طاقتور ملک ''امریکہ'' کے سابق صدر ''روز ویلٹ'' کی پریشانی یہاں تک بڑھی کہ اُن کے دماغ کی رگ پھٹ گئی اور وہ بیٹھے بیٹھے رُخصت ہوگئے اور بر طانیہ عظمیٰ کے وزیر اعظم ''ایڈن'' کو کس قدر پشیمانی ہوئی ہوگی جب اُن کو اِس وزارتِ عظمیٰ سے اِستعفاء دینا پڑا جو سالہا سال کی محنت کے بعد ترقی کرتے کرتے حاصل ہوئی تھی۔ آج جبکہ اطمینان اور سکونِ قلب کی یہ جنس ِگرانمایہ نہ کسی سر مایہ دار کی تجوری میں ہے نہ کسی صاحب ِ اِقتدار کے ایوانِ حکومت میں تو کیا یہ'' عنقا'' کی طرح ایک طائر موہوم ١ ہے جس کا نام بہت مشہور ہے مگر حقیقت یکسر مفقود ؟ بیشک ! مادّہ پرست دُنیا کا جواب یہی ہوگا۔ لیکن قرآنِ حکیم اپنے ماننے والوں کو بشارت دیتا ہے کہ اطمینان و سکونِ قلب کا وہ ''کوہِ نور '' جس کے حاصل کرنے سے پوری دُنیا اور اُس کے تمام جدید وقدیم ذرائع آج تک عاجز ودر ماندہ ہیں اُس کے خزانے اُس کے دامن میں موجود ہیں تم بھی اُن خزانوں سے اپنے دل و دماغ کی جیبیں بھر سکتے ہو، شرط صرف یہ ہے کہ اِیمانِ صحیح کے ساتھ عملِ صالح ہو اور عملِ صالح کی رگوں میں ''ذکر اللہ '' کی رُوح کار فرما ہو ( اَلَّذِیْنَ اٰمَنُوْا وَ تَطْمَئِنُّ قُلُوْبُھُمْ بِذِکْرِ اللّٰہِ اَلاَ بِذِکْرِ اللّٰہِ تَطْمَئِنُّ الْقُلُوْبُ o اَلَّذِیْنَ اٰمَنُوْا وَعَمِلُوا الصّٰلِحٰتِ طُوْبٰی لَھُمْ وَ حُسْنُ مَاٰبٍ) ( الرعد : ٢٨،٢٩) ''جو لوگ اِیمان لائے اور اللہ کے ذکر سے اُن کے دلوں کو اطمینان ہوتا ہے ،خوب سمجھ لو کہ اللہ کے ذکر سے دلوں کو اطمینان ہو جاتا ہے،جو لوگ اِیمان لائے اور نیک کام کیے اُن کے لیے خوشگواری ہے اور نیک انجام۔'' کس قدر آسان نسخہ ہے مگر افسوس اور حیرت و تعجب ہے کہ خود قرآنِ پاک کے ماننے والے اِس نسخہ سے بے خبر ہیں، وہ دُنیا کے ہر بازار میں بھٹکتے پھر رہے ہیں مگر اُن دُکانوں کا رُخ نہیں کرتے جن کا بازار اللہ عز وجل نے سجایا ہے۔ ١ فرضی افسانوی پرندہ