ماہنامہ انوار مدینہ لاہور اپریل 2011 |
اكستان |
 |
پھلجھڑیاں چھوڑنے کے بجائے سب کچھ اپنے کشادہ سینے میں سمیٹے رکھتے ہیں اَور پاس پڑوس والوں کو بھی خبر نہیں ہونے دیتے کہ کیا ہونے جا رہاہے۔ مولانا کا دُوسرا طرئہ اِمتیاز یہ ہے کہ وہ ہمیشہ نظریاتی اَور اَخلاقی سیاست کرتے ہیں ۔اِقتدارکے بجائے اِقدارکی سیاست ۔کچھ نقاد مِن میخ نکالتے اَور اِلزام دَھرتے ہیں کہ مولانا اُصولوں یا نظریوں سے جڑے رہنے کے بجائے وقت کی لہر کا ساتھ دیتے اَور اِقتدار یا مفادات کی شاداب چراگاہوں کی طرف نکل جاتے ہیں ۔ میراخیال ہے کہ یہ نقادنااِنصافی سے کام لیتے ہیں ۔وہ اُصولوں اَور نظریوںکا نقشہ پہلے سے بنالیتے اَور پھر مولانا کی سیاست کو اُن کی کسوٹی پر پرکھنے لگتے ہیں۔ حالانکہ صورتِ حال مختلف ہے۔ حقیقت ِاُولیٰ یہ ہے کہ مولانا کا ہر قول اَور ہر فعل خود بخود ایک اُصول اَور نظریے کا رُوپ اِختیار کر لیتا ہے جس طرح علامہ اِقبال کی کارگاہِ فکر میں اَنجم ڈھلا کرتے تھے ۔ اِسی طرح مولانا کی کار گاہِ سیاست میں اُصول ڈھلتے اَور نظریے تخلیق پا تے ہیں مثلاً اُصول یہ ہے کہ کسی آئین شکن ڈکٹیٹر کاکسی طور سہارا نہیں بننا چاہیے ۔لیکن جب مولانا پرویز مشرف کی مشکل آسان کرنے کے لیے سترہویں تر میم جیسا کوئی کرشمہ اِیجاد کریں گے تویہ اُصول خود بخود ساقط ہوجائے گا۔تب ایک نیا اُصول جنم لے گا کہ جمہوریت کے تحفظ اَور وَردی اُتارنے کے موہوم سے وعدے کی بنیا د پر اَگرڈکٹیٹر کے تمام مکروہ اِقدمات کی توثیق کردی جائے تو کوئی مضائقہ نہیں ۔ خلاصہ اِس کا یہ ہے کہ مولانا کی سیاست کومروجہ اُصولوں، نظریات، اَخلاقیات یااِقدار کی میزان میں تولنے کے بجائے مولانا کے اَقول واَفعال کو اَوّلیت دیتے ہوئے اُصولوں اَورنظریوں کو اُن کے آئینے میں دیکھنا چاہیے ۔جانچ پرکھ کایہ پیمانہ اَپنانے والے ہر نقاد کو اَندازہ ہوجائے گا کہ وہ غلطی پر تھا۔ مولانا کے اِس کمال کا تعلق اُن کے ایک اَور ہنر سے ہے جو پاکستان کے کسی دُوسرے سیاستدان کو عنایت نہیں ہوا۔ میں حضرت کے اِس ہنر کاتذکرہ پہلے بھی کئی بار کر چکا ہوں۔ یہ ہے دلیل آفرینی اَور منطق آرائی کا ہنر۔ وہ اِس مہارت کے ساتھ سیاہ کو سفید اَور سفید کو سیاہ ثابت کرسکتے ہیں کہ اَچھے خاصے چشم ِبینا رکھنے والے بھی آنکھیں ملتے رہ جاتے ہیں۔ کبھی کبھی اُن کا یہ ہنر اِس درجہ کمال کوپہنچ جاتا ہے کہ وہ عمومی طورپر معیوب خیال کی جانے والی کسی بات کے حق میں بھی ایسے دلائل لاتے ہیں کہ وہ کارِ ثواب دکھائی دینے لگتی